Presidenti i vendit, Hashim Thaçi i është përgjigjur akuzave të liderit të Lëvozjes Vetëvendosje, Albin Kurti lidhur me Gjykatën Speciale dhe akuzat për krime lufte ndaj tij.
Thaçi i ftuar në TV Dukagjini, ka thënë se gjatë kohës ku ai është dënuar nga Serbia me 20 vjet burg ai ka qenë në koncertin e një grupi serb “Bjello Dugme”.
“Ai e di shumë mirë se kur unë jam dënuar nga Serbia me 20 vjet burg ai ka dëgjuar “Bjello Dugmën” në Beograd. Ka marrë pjesë në koncertet e tyre”, deklaroi më tej Thaçi.
Lideri i LVV-së, Albin Kurti në një intervistë televizive kishte deklaruar se “Hashim Thaçi ka kënduar në Gjykatën Speciale për katër ditë si bilbil”.
“Nuk merrem me këso lajthitje të zotit Kurti. Më vjen keq që ai nuk ka shokë të burgut prandaj nuk ka çfarë të japë e të marrë, pasi nuk ka qenë pjesë e rezistencës as për liri e as për pavarësi. Ai u është dorëzuar autoriteteve të Serbisë dhe ka refuzuar të jetë pjesë e Ushtrisë Çlirimtare të Kosovës. Pasi është dorëzuar ka pranuar bashkëpunimin me drejtorin e burgut”.
“Nga momenti i dorëzimit te autoritetet e burgut dhe organizimi i intervistës për të në burg kur të tjerët i sakatonin dhe i mbysnin me dhunë siç ka ndodhur me shokët tanë në Dubravë dhe gjithandej Serbisë, Kurti është i njëjti në shërbim të së keqes”, ka thënë Thaçi