Nisma e të Rinjve për të Drejtat e Njeriut (YIHR Kosovo) dhe Nisma e të Rinjve për të Drejtat e Njeriut – Serbi (YIHR Serbia) dënojnë ashpër deklaratën e Presidentit të Serbisë, Aleksandar Vuçiq në lidhje me mohimin e masakrës në Reçak.
Me 15 janar 1999, forcat serbe vranë 44 shqiptarë civilë në fshatin Reçak. Misioni i Verifikimit i OSBE-së, i udhëhequr nga ambasadori amerikan William Walker, e quajti atë “një krim kundër njerëzimit”.
Masakra e Reçakut ishte gjithashtu pjesë e aktakuzës së Slobodan Milosheviqit para Tribunalit të Hagës, por asnjë aktgjykim i formës së prerë nuk ishte nxjerrë për shkak të vdekjes së tij gjatë procesit gjyqësor.
Vuçiq deklaroi se “gjithçka ishte sajuar nga ai mashtrues botëror, fabrikues dhe oportunist, Walker”.
“Kjo deklaratë është e papranueshme. Një retorikë e tillë mohuese shkel dinjitetin e viktimave dhe familjeve të tyre, ndërsa është kundër vlerave të paqes, pajtimit dhe drejtësisë. Ne i bëjmë thirrje presidentit Vuçiq të kërkojë falje dhe të ndalojë mohimin e krimeve të luftës të kryera në Kosovë dhe në rajon nga regjimi i Millosheviqit”, thuhet në deklaratën e përbashkët të këtyre dy nismave.
Po ashtu, YIHR Kosova dhe Serbia bëjnë thirrje të gjithë liderëve politikë në Serbi dhe liderëve politikë serb në Kosovë që të distancohen nga deklarata të tilla ekstremiste dhe t’u bëjnë thirrje qytetarëve që të njohin, respektojnë dhe angazhohen në arritjen e drejtësisë për të gjitha viktimat, të mbijetuarit e dhunës seksuale dhe personat e pagjetur nga lufta në Kosovë.
“Ne, si të rinj nga Kosova dhe Serbia, do të qëndrojmë gjithmonë kundër mohimit të krimeve të luftës. Ne jemi të vendosur të vazhdojmë të kundërshtojmë narrativat nacionaliste dhe vazhdimisht do të punojmë për ndërtimin e paqes dhe pajtimit midis Kosovës dhe Serbisë”, përfundon komunikata.