Richard Grenell, Emisari i Presidentit të SHBA’ve në bisedimet Kosovë – Serbi, ia ka dalë t’i shtyjë të dy shtetet drejt një marrëveshje për hapjen e një linje ajrore Kosovë –Serbi. Për këtë ka reaguar edhe NATO, e cila është kontrolluese e hapësirës ajrore në Kosovë.
Sekretari i Përgjithshëm i NATO’s, Jens Stoltenberg, ka thënë se ky është një hap i rëndësishëm për të normalizuar marrëdhënjet ndërmjet të dyja vendeve.
“Unë mirëpres qëllimin e Euroëings dhe Grupit Lufthansa për të vendosur fluturime të drejtpërdrejta midis Beogradit dhe Prishtinës, bazuar në letrat e synimeve të nënshkruara sot në Berlin”, ka thënë Stoltenberg.
Ai ka deklaruar se linja e fluturimeve Prishtinë – Beograd është hap i rëndësishëm, ku ka shtuar se është përpjekje për të promovuar normalizimin e marrëdhënjeve ndërmjet të dyja vendeve.
“Ky është një hap i rëndësishëm, i cili do të kontribuojë në përpjekjet për të promovuar normalizimin e marrëdhënieve ndërmjet Beogradit dhe Prishtinës, dhe do ta bëjë qarkullimin e njerëzve dhe mallrave më të lehtë dhe më të shpejtë brenda rajonit të Ballkanit Perëndimor”, është shprehur Stoltenberg.
Linja ajrore Kosovë – Serbi ishte është ndërprerë për shkak të luftës ndërmjet palëve. Për hapësirën ajrore, e cila në Kosovë kontrollohet nga NATO, Kosova e Serbia asnjëherë s’kanë mundur të gjejnë gjuhë të përbashkët edhe pse për këtë ka pasur tentativa.
Lajmi për këtë depërtim është bërë i ditur në një ceremoni në Berlin. Aty kanë qenë të pranishëm zyrtarë të lartë amerikanë të cilët ndodhen në Gjermani për negociata rreth Libisë. Por, kanë gjetur rastin që bashkë me Lutfhansën, kompani e fuqishme gjermane ajrore të bëjnë publik se do të ketë një linjë ajrore Prishtinë -Beograd.
E nga palët, i pari ka folur drejtori i të ashtuquajturës Zyrë për Kosovën në qeverinë serbe, Marko Gjuriq. Por këtë e ka bërë pak me sherr duke e paraqitur si marrëveshje bilaterale ndërmjet Qeverisë së Serbisë dhe Kompanisë Luthansa.