Në korridorin e ngushtë të Klinikës së Pulmologjisë, doktori Shpetim Thaçi takohet me një infermiere për të vazhduar rrugën deri te pacientët të cilët tashmë e kanë kaluar COVID-19.
Në anën e djathtë të këtij korridori, gjenden dhomat me nga tre shtretër, në disa prej tyre janë të shtrirë disa pacientë. Dyert e këtyre dhomave ishin te hapura në mënyrë që rrezet e diellit të depërtonin nga ana e majtë e kësaj klinike.
Për doktorin Thaçi, kjo periudhë e pandemisë ka qenë shumë e vështirë, teksa thotë se nuk janë ndalur asnjëherë në mënyrë që qytetarët të marrin trajtimin e duhur.
Thaçi ka thënë se pacientët në Klinikën e Pulmologjisë kanë ardhur në gjendje të ndryshme shëndetësore.
“Gjendemi në Klinikën e Pulmologjisë, në repartin D, aty ku sot për gjashtë muaj me radhë kemi të shtrirë pacientë të cilët kanë qenë pozitiv dhe negativ në reparte tjera të ndara. Vlen të theksohet se gjatë kësaj kohe kemi pasur një fluks jashtëzakonisht të madh të pacientëve, posaçërisht nga data 22 qershor e tutje ku kemi pasur numër të madh të pacientëve me gjendje të rëndë. Personeli shëndetësor ka bërë një punë të jashtëzakonshme me qëllim që të ju dalin në ndihmë qytetarëve”, tha ai.
Numri i vizitave ambulantore gjatë kësaj periudhe kohore ka qenë mbi 113 vizita në Klinikën e Pulmologjisë, ndërsa kapaciteti total ka qenë 101 pacientë të shtrirë në klinikë, ku pothuajse të gjithë kapacitetet kanë qenë të zëna.
“Pacientët kanë ardhur me gjendje të ndryshme, në gjendje të lehtë, ndërsa në muajin korrik dhe gusht kanë qenë në gjendje të rëndë shëndetësore, ku është dashtë të bëhet menaxhimi dhe kontrollimi i tyre po thuajse 24 orë, në mënyrë që rrjedhja e sëmundjes së tyre të jetë korrekte. Ka pasur raste të ndryshme emocionale. Përkundër marrjes së të gjitha masave nga personeli, gjendja e tyre ka qenë shumë e rëndë dhe kanë përfunduar me vdekje”, tha ai.
Doktori Thaçi përmendi edhe një nga rastet më të veçanta që ka pasur gjatë kësaj kohe.
“Njëri nga rastet ka qenë kur prindi me djalin e tij kanë qenë të shtrirë në repartin D të Pulmologjisë, djali ishte 42 vjeçar dhe në një gjendje të rëndë shëndetësore, e po ashtu edhe prindi. Djali vdes pas një komplikimi, ndërsa prindi mbijeton në moshën 83 vjeçare dhe lirohet në shtëpi pas 1 jave”, u shpreh tutje.
“Nuk i kemi treguar se djali i tij ka ndërruar jetë për shkak se ka qenë në gjendje të rëndë emocionale dhe shpirtërore. Në një gjendje të tillë nuk i kemi treguar fare, ndërsa pasi është liruar në shtëpi, familjarët i kanë treguar për vdekjen e të birit”, pohoi ai.
Doktorit Thaçi thotë se punën më shumë ia ka vështirësuar fakti se edhe bashkëshortja e tij është mjeke.
“Për mua ka qenë shumë e rëndë kjo periudhë, për shkak se e gjithë familja jemi personal mjekësor, edhe bashkëshortja ime është mjeke. Dhe ne nuk kemi pasur pushime mjekësore dhe kemi qenë të obliguar që të dalim në punë dhe të ju dalim në ndihmë qytetarëve në këtë kohë pandemie. Pra, kemi bërë një përshtatje të orarit. Kemi qëndruar së bashku duke respektuar distancën, dhe me maska në banesë pasi që kemi dy fëmijë të vegjël”, pohoi ai.
Thaçi tregoi se për momentin në Klinikën e Pulmologjisë janë 50 pacientë, ndërsa nuk kanë asnjë pacientë me COVID-19.
Doktori thotë se pas mjekimit, pacientët mund të kenë pasoja të vogla.
Ai gjithashtu ka folur edhe për stinën e dimrit, dhe gjasat që të rritet numri i personave të infektuar me COVID-19.
“Duke hyrë në stinën e dimrit, probabiliteti që të kemi një rritje është i madh, për shkak të ftohtit. Ajo që është e rëndësishme është sepse mbrojtja mbetet e njëjtë. Nëse popullata do t’i respektojë rekomandimet e mjekëve, që kanë të bëjnë me mbajtjen e maskave dhe ruajtjen e distancës shpresoj të mos kemi rritje të numrit”, u shpreh ai.
Në fund, doktori tha se mbajtja e distancës, higjienës dhe mbajtja e maskës janë rregullat kryesore që të ulet numri i të infektuarve dhe që kjo do të shpëtojë sistemin shëndetësor nga kolapsi.