Ka dhënë dorëheqje kryetarja e Forumit të Gruas së PDK-së në Vushtrri, Gjylsime Feka-Ferati.
Në letrën e dorëheqjes, të cilën ua ka drejtuar strukturave të degës së PDK-së në Vushtrri, ajo i dëshiron kësaj partie reformim.
“Ju njoftoj se jap dorëheqje nga të gjitha funksionet e PDK-së Vushtrri, funksione këto që i kam ushtruar deri më tani. Ju dëshiroj, në radhë të parë shëndetin, suksese në punë e në çdo sferë tjetër të jetës. Harmoni, dashuri e respekt.
Dëshiroj zhvillim e prosperitet dhe reformim të partisë, meritokraci, që aq shumë është folur për këtë të fundit e aq pak ka ardhur në shprehje, dhe vizion të qartë për një shtet më të fortë e më të zhvilluar, ku do të mundnin të kenë hapësirë për veprim edhe ata që e lanë, e në mesin e tyre edhe tri vajzat e mia”, ka thënë Feka-Ferati në letrën e dorëheqjes.
Mësohet se Gjylsime Feka-Ferati aktivitetin e saj politik do ta vazhdojë në Lëvizjen Vetëvendosje.
Ajo është në listën e kandidatëve të Vetëvendosjes për asamble Komunale në Vushtrri për zgjedhjet lokale të 17 tetorit, ku mbanë numrin 18.
