Kosova sonte e luan ndeshjen e radhës në kuadër të kualifikimeve për Kampionatin Botëror që zhvillohet vitin e ardhshëm. Në stadium “Fadil Vokrri” Kosova e pret Spanjën në ndeshjen e dytë mes tyre. Ndeshja e parë e zhvilluar në Sevilla përfundoi 3:1 për “Furinë e Kuqe”. Golin e vetëm për Kosovën e shënoi Besar Halimi, nga rreth 40 metra distancë.
Sonte, “Dardanët” do të synojnë rezultat pozitiv për t’ia vështirësuar edhe më shumë punët Spanjës. Ekipi i Luis Enriques humbi ndaj Suedisë xhiron e kaluar dhe kështu e humbi edhe vendin e pare, pozita e vetme në grup që dërgon direkt në Botëror.
Të dy ekipet kanë publikuar formacionet startuese për këtë ndeshje.
Formacioni i Kosovës:
Formacioni i Spanjës:
Spanja është njëra prej tri kombëtareve në grupin e verdhekaltërve, bashkë me Greqinë dhe Gjeorgjinë, që s’e njohin pavarësinë e Kosovës. Për më tepër vendi iberik është kundërshtar i zëshëm i pavarësisë se shtetit më të ri evropian, kryesisht për shkak të Katalonjës, rajonit të vet verilindor, e cila kishte votuar unanimisht në një referendum në vitin 2017 për t’u pavarësuar nga Spanja.
Federata e Futbollit e Spanjës dhe disa media atje e kanë mënjanuar përmendjen e emrit “Kosovë”, kur kanë folur apo shkruar për Kombëtaren e Kosovës. Në takimin e parë mes Spanjës dhe Kosovës në Sevillë në mars, të cilën ekipi dardan e humbi 3:1, federata spanjolle shkoi aq larg saqë e quajti Kosovën “territor”.
Edhe tani para takimit të dytë në Prishtinë, spanjollët janë mundur ta shmangin sa më shumë përmendjen e emrit “Kosovë”.
Derisa Kosova është pothuajse e pashpresë dhe pa gjasa për ta siguruar pjesëmarrjen në një turne të madh për herë të parë në historinë e vet, Spanja është lidere e Grupit B dhe synon të kualifikohet direkt në Katar 2022.
Spanja i ka 10 pikë në vendin e parë, një më shumë se Suedia në vendin e dytë, por i ka zhvilluar dy ndeshje më shumë se kjo e fundit. Prandaj, vendi i parë në grup nuk është i sigurt për furinë e kuqe.
Kosova, nga ana e saj, renditet e treta me vetëm katër pikë, pothuajse pa shpresa për kualifikim. Vendi i parë shkon direkt në Katar 2022, ndërsa vendi i dytë luan në play-off.
Trajneri i Spanjës, Luis Enrique, e lartësoi Kosovën, duke thënë se ajo meriton më shumë pikë seç ka dhe se do t’ia bëjë të vështirë punën ekipit të tij.
“Nesër do të jetë njëra prej ndeshjeve më të vështira të këtij grupi. Më pëlqen sesi luan Kosova. Ajo meriton shumë më shumë pikë sesa ka tani. Është ekip që ta koklavitë jetën”, ishte thënë Enrique.
Trajneri i Kosovës, Bernard Challandes, paralajmëroi lojë mbrojtëse, duke u arsyetuar në cilësitë e mëdha që i zotëron Spanja.
“Është shumë e vështirë për këdo të luajë ndaj Spanjës. E kemi parë në ndeshjen e fundit, posedimin e topit, rastet, por në fund, Suedia fitoi. Ndaj Spanjës ne duhet te mbrohemi, por jo vetëm Kosova, edhe ekipet tjera. Te them se do të fitojmë ndaj Spanjës, është e vështirë të thuash, por edhe të thuash se është e pamundur është budallallëk”, tha Challandes.
Kjo do të jetë ndeshja e fundit për Kosovën në shtator. Dardanët do t’i zhvillojnë edhe tri ndeshje deri në përfundim të fushatës kualifikuese, kundër Suedisë dhe Gjeorgjisë në tetor dhe ndaj Greqisë në nëntor.