Kryeministri aktual i Kosovës, Avdullah Hoti ka folur për shkarkimin që ia bëri Albin Kurti, në kohën sa mbante postin e zëvendëskryeministrit.
I pyetur se a i ka ardhë inati kur është shkarkuar nga Kurti, Hoti është përgjigjur se nuk di se si ta shpjegojë tani atë ndjenjë.
“Nuk e di drejt më të thënë, tash nuk di me shpjegu. Ne e patëm një marrëveshje një bashkëpunim, nuk eci përpara, e ndërruam kaq. Ne i dhamë mundësi këtij. Ne e kemi bërë kryeministër këta – bashkë sigurisht por pa ne nuk ish bë”, është shprehur Hoti në emisionin Oxygen.
Madje, Hoti është shprehur se ai ka ndikuar tek Vetëvendosje që Vetëvendosje të jenë më “institucionalist”.
“Unë kam punuar me ta (Vetëvendosjes) edhe sa kam qenë shef i grupit parlamentar të LDK-së për dy vjet – kam punuar me ta për me i pru këndej, me i bo më institucional. Edhe në qeveri jam mundu me i ndihmu që mos me bë lëshime, mos me bë gabime”, ka deklaruar kryeministri.