Është ndarë nga jeta në moshën 85-vjeçare aktorja e madhe e skenës shqiptare Mimika Luca.
Lajmin për ndarjen nga jeta të aktores e ka bërë djali i saj, biznesmeni Gjergj Luca, përmes një postimi në rrjete sociale.
“E shtrenjta nëna ime, Mimika Luca, sot mori rrugën për në Parajsë!
Miqtë dhe dashamirët i presim të Hotel “International”, pas Lidhjes së Shkrimtarëve”, shkruan Luca.
Kush ishte Mimika Luca?
Ajo u lind në Gjirokastër, më 24 dhjetor të vitit 1937, dhe në moshë shumë të re interpretoi në skenën e Teatrit të Operas dhe Baletit si balerinë. Për njëmbëdhjetë vite, nga 1951 deri në 1962, ishte balerinë në TKOB. Më pas, jeta e saj mori një drejtim tjetër, atë të aktrimit.
Mimika Luca u pranua në vitin 1962 si aktore në Teatrin Popullor, ku ka interpretuar rreth 30 role, si Suzana, Luçia, Dila “Cuca e maleve”, Sonja, Nica “Gjenerali i ushtrisë së vdekur”, Laja “Kur hidheshin themelet” etj. Ka interpretuar edhe në 12 filma artistikë. Roli i parë ka qenë krah bashkëshortit Ndrek Luca, në filmin “Detyrë e posaçme”, më pas në filmin “Kryengritje në pallat”, “Kur hidheshin themelet” e shumë të tjerë.
Fatkeqësisht, sot ajo ka mbyllur sytë përgjithmonë për të shkuar pranë bashkëshortit të saj, aktorit të shquar Ndrek Luca.