Deputeti i Aleancës për Ardhmërinë e Kosovës, Bekë Berisha ka hedhur dyshime mbi deklaratat e ish-kryesuesit të bordit të Agjencisë Kosovare të Privatizimit (AKP), Blerim Rexha, i cili javën e kaluar raportoi para anëtarëve të Komisionit Hetimor Parlamentar lidhur me procesin e privatizimit në Kosovë.
Rexha kishte thënë se i ishte dhimbsur toka e Kosovës që të shitej për 1 euro ari. Ndërkaq gjatë mbledhjes së sotme të këtij komisioni, deputeti Berisha tha se ka informacione që Rexha gjatë një mbledhje të AKP-së kishte votuar për shitjen e një toke për 50 cent arin.
“Një dëshmitarit këtu iu ka dhimtë shumë toka e Kosovës me e shitë për një euro. Edhe këta duhet me shku me i marrë transktriptet se unë kam informacion që atij s’ju kish pasë dhimtë hiç. Edhe për 50 cent e kish pasë çu dorën njëherë”, ka deklaruar Berisha.
Ai ka thënë se deklarata e Rexhës duhet të konfirmohet dhe se duhet të shqyrtohet mundësia që ai të ftohet sërish për intervistim në komision.