Kandidati për kryeministrie Albin Kurti deklaroi se Besëlidhja e Lezhës paraqet një nga datat më të rëndësishme të kombit shqiptar në historinë e tij.
Gjatë një tribune organizuar sonte nga Lëvizja Vetëvendosje në platformën online, me rastin e 577-vjetorit të Besëlidhjes së Lezhës, Kurti foli për rëndësinë e kësaj ngjarjeje në historinë e kombit shqiptar.
“Besëlidhja e Lezhës shënon një pikët të rëndësishme në historinë e shqiptarëve. Politikisht, na nevojitet një Skënderbe që është kompleks e madhështor, shumë më tepër se i thjeshtë dhe i madh, dhe në këtë mënyrë i kontribuojmë edhe historisë dhe ardhmërisë me politikën e hollë midis të dyjave këtyre”, tha Kurti.
Besëlidhja e Lezhës shënon një hap përcaktues përpara në historinë kombëtare për bashkimin e tokave shqiptare në një shtet të përqendruar, me të cilin arrin pikën kulmore tradita shtetërore në mesjetën shqiptare por edhe ofron frymëzim për nisma të tjera në të ardhmen, po aq të rëndësishme.
Mbi parimet e Besëlidhjes së Lezhës, katër shekuj më vonë, u themelua edhe Lidhja Shqiptare e Prizrenit dhe Besëlidhje të tjera autentike kombëtare, të cilat bazoheshin në kodeksin shqiptar të organizimit për mbijetesë në kushte dhe rrethana të caktuara të historisë, ku ekzistenca e kombit shqiptar u vu në rrezik dhe përgjigja shqiptare ishte e fuqishme për të ndaluar planet dhe vendimet e huaja që binin ndesh me vetë mbijetesën dhe krijimin e një shteti shqiptar.