Sot, shefi i Diplomacisë së BE-së, Josep Borrell, ka zhvilluar një bisedë telefonike me Sekretarin Amerikan të Shtetit, Antony Blinken.
Sipas komunikatës së BE’së, diskutimi i tyre u përqendrua në takimin e ardhshëm të nivelit të lartë të dialogut të ndërmjetësuar nga BE midis Beogradit dhe Prishtinës të shtunën në Ohër, situatën në Etiopi dhe përgatitjet për Këshillin e Energjisë BE-SHBA muajin e ardhshëm.
Borrell e informoi Sekretarin Blinken për zhvillimet e fundit lidhur me procesin e normalizimit të marrëdhënieve ndërmjet Kosovës dhe Serbisë, ku theksoi pritshmëritë e tij për takimin e Ohrit dhe nënvizoi rëndësinë e progresit në Dialog për aspiratat evropiane të të dyja vendeve.
Sipas njoftimit, Borrell ka vlerësuar mbështetjen e vazhdueshme të qartë të SHBA-së për përpjekjet e BE-së, veçanërisht për marrëveshjen për rrugën drejt normalizimit të marrëdhënieve mes dy vendeve.
“Ai vlerësoi mbështetjen e vazhdueshme të qartë të SHBA-së për përpjekjet e BE-së, veçanërisht për Marrëveshjen për rrugën drejt normalizimit të marrëdhënieve dhe për procesin në prag të takimit të nivelit të lartë që Përfaqësuesi i Lartë po takohet me Presidentin Vuçiq dhe Kryeministrin Kurti këtë të shtunë”, thuhet në komunikatë.
Tutje, BE bën të ditur se edhe Borrell por edhe Blinken janë dakorduar se ky është momenti i duhur për të bërë hapa të rëndësishëm përpara në interes të integrimit të Kosovës dhe Serbisë në BE.
“Të dy ranë dakord se ky ishte momenti i duhur për të bërë hapa të rëndësishëm përpara në interes të integrimit të Kosovës dhe Serbisë në BE”, thuhet në komunikatë.