Ndonëse u raportua se pati një përplasje me deputetin e LDK-së, Xhavit Ukaj, deputeti i PDK-së, Bekim Haxhiu, jep një version tjetër të asaj që ndodhi në seancën e sotme.
Haxhiu thotë se nuk ka pasur përplasje sot në Kuvend mes tij dhe kolegut nga LDK-ja, por vetëm ka dashur t’ia japë ta nënshkruajë kërkesën për mocionin e mosbesimit ndaj Qeverisë së Avdullah Hotit.
Sipas deputetit të PDK-së, i njohur si Kamishi, Ukaj i LDK-së u vetofrua ta nënshkruajë mocionin ndaj kryeministrit nga partia e tij, por deputeti i Vetëvendosjes nuk ia dha.
“Nuk ka pasë asnjë përplasje në Kuvend, deputeti i LDK-së z. Xhavit Uka po e kërkonte listën për nënshkrim të mocionit për rrëzimin e Qeverisë Hoti.
Për befasi LVV edhe pse e ka iniciuar mocionin për rrëzim të Qeverisë Hoti, nuk ia ofroi deputeti z. Xhavit Ukaj mundësinë që ta nënshkruajë atë”, ka shkruar Kamishi.
Një përplasje mes deputetëve Ukaj dhe Haxhiu u raportua se ka ndodhur sot në seancën e Kuvendit.
Gjithçka ndodhi në momentin kur Ukaj u ngrit në këmbë duke i thënë Haxhiut, që t’ia sjellë mocionin për rrëzimin e Qeverisë Hoti.
“Bire këtu mocionin, unë ta nënshkruaj”, i ka Ukaj Haxhiut, raporton Front Online.
Në këtë përplasje ndërhyri shefi i deputetëve të LDK-së, Arben Gashi, i cili kërkoi nga deputeti Xhavit Ukaj të ulet. “Ulu bre se nuk ka kuptim”, dëgjohet duke i thënë Gashi Ukajt.
As Haxhiu dhe as Ukaj nuk e morën fjalën në Kuvend dhe përplasja duket se ka ndodhur pa mikrofonë, derisa deputetët e tjerë flisnin.
Ndryshe, deputeti Ukaj, muaj më parë, është komentuar pasi ai i shkoi te vendi kryeparlamentares Vjosa Osmani dhe iu vërsul për ta sulmuar fizikisht.