Deputeti i Lëvizjes Vetëvendosje Eman Rrahmani, ka reaguar shumë ashpër pas hapjes së Ambasadës së Kosovës në Izrael. Ai e ka konsideruar si hap të dëmshëm në rrafshin diplomatik duke thënë se ky veprim nuk pasqyron vullnetin e popullit të Kosovës.
Duket që z.Rrahmani nuk po arrin të kuptojë se partia e tij ka dalë e para në zgjedhje dhe ka mundësi të revokojë vendimin për hapjen e Ambasadës së Kosovës në Jerusalem.
Ai ka fajësuar qeveritë e kaluara për një gjë të tillë, ani pse është çështje ditësh kur partia e tij do të marrë pushtetin dhe do të ketë në duar edhe fatin e asaj ambasade ashtu si fatin e Kosovës.
“Njohja e shtetësisë nuk blihet në kurriz të tjerëve, nuk blihet duke bërë padrejtësi ndaj popujve. Çdo kush, çdo herë, kudo e kurdo do të korrë atë që ka mbjell.” – ka thënë Rrahmani, që do të jetë deputet i VV-së edhe në Legjislaturën e VIII.
Reagimi i tij i plotë:
Këto qeveri e qeverisje për 22 vite u kanë bërë dëme qytetarëve e vendit tonë, kanë hapur shumë “ambasada serbe” në Kosovë.
-ZAJEDNICA, e cila është provuar të formohet nga pushtetarët servilë e të korruptuar.
-DEMARKACIONI, është një tjetër ambasadë në territorin e Republikës së Kosovës.
-Formimi i komunave me shumicë serbe, është hapja e shumë ambasadave në Republikën e Kosovës.
-Vendet e rezervuara janë një tjetër ambasadë serbe në Kuvendin e Republikës së Kosovës.
-Qeveritë ilegale, qeveritë që punuan kundër interesave të popullit të tyre për 20 vite, nuk mund të mos jenë të dëmshme edhe në arenën ndërkombëtare. Qeveri e qeverisje të tilla janë shkelëse të atyre që janë të dobët, e servil ndaj të fortit.
Kjo tregon që këto qeverisje e ky pushtet kur i jepet mundësia edhe mund të bëjnë të padrejta, mund të bëhen mohuese të vërtetës. Një popull që për një shekull luftoi për liri, për drejtësi e pavarësi nuk mund të dalë kundër të drejtës, lirisë dhe demokracisë. Qëndrimet e këtyre pushteteve nuk duhen të jenë qëndrime të popullit i cili më së miri di të tregojë për liri, barazi e drejtësi.
Njohja e shtetësisë nuk blihet në kurriz të tjerëve, nuk blihet duke bërë padrejtësi ndaj popujve. Çdo kush, çdo herë, kudo e kurdo do të korrë atë që ka mbjell.