Anëtarja e Kryesisë së Lëvizjes Vetëvendosje, Arbërie Nagavci, i ka dërguar ‘selam’ Lidhjes Demokratike të Kosovës, veçmas Vjosa Osmanit, e cila deklaroi sot se VV duhet të thrras në takimin e radhës, përcjellë Gazeta Blic.
Përmes një shkrimi në llogarinë e saj në facebook, Nagavci, ka thënë se ata janë të interesuar që të arrijnë koalicion me Lidhjen Demokratike, por ka thënë se ata duhet ta dinë se Lëvizja Vetëvendosje, ka dalur fituese e zgjedhjeve të 6 tetorit.Madje, ajo ka shtuar se shpreson që LDK e ka kuptuar qartë porosinë që qytetarët ua dhanë partive politike më 6 tetor.
Postimi i plotë i Nagavcit:Shumë mirë që znj. Osmani ka deklaruar se ka vullnet të LDK-së për të arritur marrëveshjen për bashkëqeverisje. Pajtohem plotësisht se është me interes që të ketë një ambient bashkëpunues, andaj dhe LV! në vazhdimësi ka dhënë propozime e është angazhuar për të përmbyllur marrëveshjen duke treguar gadishmëri dhe për të nominuar kandidatin/ten e LDK-së për kryeparlamentar/e, ndonëse sipas Kushtetutës kjo e drejtë i takon LV!- së si fituese e zgjedhjeve.
Për të funksionuar bashkëpunimi duhet angazhim dypalësh, me përfshirje, propozime, korrektësi e principe, pa kërkesa kundërkushtetuese e goditje nën brez. Deklarata për “fushatë linçuese” është një e tillë.Në zgjedhjet e fundit parlamentare, qytetarët na ngarkuan me përgjegjësi. I dhanë besimin më të madh Albin Kurtit dhe Lëvizjes VETËVENDOSJE! si dhe e nxorrën si forcën e dytë politike LDK-në.
Duke qenë fitues të këtyre zgjedhjeve LV! është e angazhuar maksimalisht që të formojmë sa më parë qeverinë dhe të fillojmë punën në përmbushjen e premtimeve që kemi dhënë para qytetarëve.Shpresoj se edhe LDK- ka lexuar e kuptuar qartë porosinë që na dhanë qytetarët dhe do të kenë të njejtin vullnet si deritani për të përmbyllur sa më parë marrëveshjen për bashkëqeverisje. Kjo është ajo çfarë presin nga ne qytetarët.