Pa asnjë ditë pune, djali i Presidentit Hashim Thaçi, Endriti ia ka dalë që të blejë një orë dore që kushton rreth 8 mijë euro. Ai dje u pa në stadiumin “Fadil Vokrri”, me një ore dore të firmës “Hublot”, çmimi i së cilës është 7 mijë e 600 euro. Ndryshe, sipas regjistrit për deklarimin e pasurisë, Endrit Thaçi i ka të kursyera rreth 14 mijë euro para ta gatshme në banka.
Kosova dhe Anglia u takuan mbrëmë në stadiumin “Fadil Vokrri”, për ndeshjen përmbyllëse për të dy ekipet kombëtare në fushatën kualifikuese për Euro 2020. Në mesin e atyre që ishin në stadium për të parë ndeshjen ishte edhe Presidenti i Kosovës, Hashim Thaçi me djalin e tij Endritin.
Përveç kritikave se pse djali i Thaçit duhet të jetë çdo herë i ulur në zonën VIP, në sy ra edhe ora e këtij të fundit. Endriti mbante një orë dore të firmës “Hublot”, çmimi i së cilës është 7 mijë e 600 euro.
Fëmija i vetëm i Hashim dhe Lumnie Thaçit është vetëm 20 vjeçar, por në llogarinë e tij derdhen me mijëra euro çdo vit. Aktualisht, ai ka në xhirollogari 13 mijë e 500 euro.
Endrit Thaçi njihet edhe për udhëtimet e tij luksoze në shtete si Zvicra, Gjermania, Franca, Turqia, SHBA’të, Italia e Austria që janë kthyer në destinacione ku ai udhëton çdo vit.
