Bilall Hoti, mësuesi i kryeministrit të ri, sot është parë i emocionuar që një nga nxënësit e tij shembullorë u bë kryeministër.
Në një intervistë për Klan Kosovën ai ndau gjëra interesante nga fëmijëria e Avdullah Hotit në Ratkoc të Rahovecit duke treguar për pesëshet dhe interesimin e madh që ka pasë për libra.
“Po ndihem mjaft mirë që një nxënës i shkollës tonë ka arritur të bëhet kryeministër. E kujtojmë si një nxënës mjaft të mirë, i edukuar dhe që ka qenë gjithmonë i përgatitur. Asnjëherë s’ka pasë katërshe, por vetëm pesëshe”.
Por a ka bërë sherre ndonjëherë i urti Avdullah Hoti?
“Sikur sot që duket ai asnjëherë s’ka qenë problematik, por i urtë dhe bashkëpunëtor me nxënës e arsimtarë, i ka kryer me rregull detyrat dhe për të gjithmonë flitet mirë.
Askush nuk mund të flet për të keq si i ri dhe si student”.
“Avdullahu bashkë me dy shokët e tij kanë qenë motiv për gjithë klasën.
E gjithë klasa ka qenë e mirë, por ky e dy shokët e bankës së tij e kanë arritur kulmin e shkollimit”.
Mësuesi i tij tregoi edhe për vështirësitë financiare që ka pasë Hoti gjatë shkollimit.
“Familja e tij është marrë me bujqësi dhe kur Hoti ka shkuar edhe me dele, librin e ka pasë me veti.
E kam parë vetë sepse nga ajo e anë e kam fushën, por edhe e njoh si kushëri.
Si arsimtarë gjithmonë iu kemi thënë familjarëve të tyre që të shkollojnë sepse nuk i kanë mundësitë.
Avdullahu si nxënës edhe si student gjithmonë u rrit me vështirësi dhe me skamje.
S’i ka pasë kurrë kushtet e mira për shkollim, por ka pasë interesim të madh për mësim dhe ia ka arritur”.