U.d. i kryetarit të PDK-së, Enver Hoxhaj, ka thënë se janë ndjerë të befasuar nga qëndrimi i LDK-së, karshi zgjedhjes së Vjosa Osmanit si presidente.
Sipas tij, për këtë mbështetje, pati marrëveshje paraprake për zgjedhjet lokale, mes LDK-së e Vjosa Osmanit, për ta mbështetur pushtetin absolut të Albin Kurtit.
”Besa na ka habitur qëndrimi i kolegëve tanë opozitar i LDK-së. Që pa ndonjë kusht, pa ndonjë arsye, po sigurisht me ndonjë marrëveshje për zgjedhje lokale apo ndonjë marrëveshje të fshehtë vendosën ta mbështesin pushtetin absolut të Albin Kurtit”.
”LDK ka marrëveshje me zonjën Osmani. Ne mendojmë kështu. Ne kemi pritur që partitë politike opozitare mund të koordinohen. Kemi pritur që LDK do duhej të koordinohej së bashku me ne dhe AAK-në, për krijimin e një kulture të re politike ku presidenti zgjidhet në mënyrë të re konsensuale”, tha ai në Klan Kosova.