Pasojat ekonomike nga koronavirusi po i ndien i tërë globi, dhe përjashtim nuk bën as vendi ynë. Shumë biznese kanë raportuar humbje të mëdha në të hyra, e ndër to është edhe sektori i gastronomisë.Si masë e parë e ndërmarrë për t’u mbrojtur nga sëmundja COVID-19, nga qeveria e vendit tonë ishte mbyllja e restoranteve dhe kafeterive.
Veton Zuka, anëtar i Bordit të Gastronomëve të Kosovës, në një lidhje direkte për “Radio Prishtinën”, ka kërkuar ndihmën e shtetit për rimëkëmbjen e këtij sektori i cili thotë të ketë pësuar humbje të madhe gjatë përballjes se vendit me virusin COVID 19.
Zuka, lajm të mirë e sheh vendimin për hapjen e pjesshme të këtij sektori më 18 maj për të vazhduar me hapjen e kompletuar më 1 qershor.“Sektori i parë që është prekur është sektori i gastronomisë, impakti ka qenë fatal se nuk ka funksionuar asgjë.
Krejt çka është duhet është ta rehabilitojmë vetë këtë çështje me ndihmën e shtatit. Lajm i mirë është që hapja bëhet më 18 maj dhe një hapje definitive më 1 qershor”, tha ai në emisionin “Drive Time” të “Radio Prishtinës”.
Ndihmesa nga ana e Ministrisë së Financave e dhënë për punëtoret në këtë sektor tashmë është drejt kompletimit, mirëpo Zuka thotë se bizneset direkt nuk kanë pranuar një ndihmesë të tillë.
“Faza e parë e ndihmës prej shtetit që është dhënë ka qenë kjo faza e ndihmesës së punëtoreve, por jo bizneseve direkt”, tha më tej ai.Shoqata e Gastronomeve të Kosovës, tha Zuka, pritet të formojë një grup punues për të shikuar në përgjithësi se ku ekziston nevoja më e madhe për të ndihmuar.
Në “Drive Time” me Arin dhe Bernën në “Radio Prishtina”, Zuka ka bërë publike kërkesat që kanë si shoqatë ndaj qeverisë së Kosovës.“Kërkesat tona janë qiratë, kreditë e bizneseve, interesat e bizneseve. Shteti me i ndihmu bizneset që janë në kredi, të shtyhet afati i pagesave së kredive. Problemi kryesor qëndron pas hapjes, pasi që bizneset direkt hyjnë në borxhe. Qeveria ka mbetur që me grup punues t’i shqyrtojnë kërkesat në mënyrë që vazhdimi i punës me qenë më i mire”, tha Zuka.