“Politika fiton mbi sportin”, shkruan në mbititull gazeta kroate Veçernji List, në një artikull mbi vendimet skandaloze të autoriteteve serbe për t’i ndaluar hyrjen në territorin e saj ekipit përfaqësues të Kosovës në boks.
Boksierët e Kosovës kanë bërë tri përpjekje për të hyrë në Serbi – për të marrë pjesë në Kampionatin Botëror të Boksit që fillon të hënën në Beograd – në dy ditët e fundit, por janë ndalur në kufi nga autoritetet e Serbisë.
Madje herën e dytë provuan të hyjnë në Serbi nga pika kufitare e Konçulit pa mbajtur uniformat me simbole të Kosovës. Por as kjo nuk ka mjaftuar.
Ngjarja ka marrë vëmendje në Kroaci. E përditshmja kroate Veçernji List, në versionin e saj online e cilëson skandaloz vendimin e autoriteteve serbe.
Më shumë sesa mbititulli i gazetës që shkruan: “Politika fiton mbi sportin”, më i ashpër e që shpërfaq raportin e regjimit të Vuçiqit ndaj kosovarëve, është titulli i artikullit të Veçernji List.
“Skandal: Vuçiq ‘pështyn’ në fytyrë sportin – Kampionati Botëror i boksit në Beograd pa kosovarë”, shkruhet në titullin e artikullit të gazetës kroate.
Lidhur me ndalimin e hyrjes së ekipit përfaqësues të Kosovës në boks brenda territorit të Serbisë, sot ka reaguar Komiteti Ndërkombëtar Olimpik (IOC).
IOC-ja e ka lënë përgjegjës Federatën Ndërkombëtare të Boksit Amator (AIBA) lidhur me diskriminimin që është bërë ndaj Kosovës.