Kryetari i partisë Fjala, Gëzim Kelmendi, ka thënë se besimtarët myslimanë në Kosovë po diskriminohen dhe kjo për shkak të udhëheqjes së shtetit.
“Besimtarët myslimanë në këto 20 vjet janë persekutuar në Kosovë në aspektin e shkollimit, të punësimit, të arsimit të mirëfilltë. Dhe kjo për shkak të ideologjisë politike që ka mbretëruar në Kosovë në këto vjet.
“Politikëbërjes kosovare i ka munguar një moral politik ngase nuk kanë qenë asnjëherë korrekt me qytetarët e Kosovës, por as edhe me miqtë ndërkombëtarë që na kanë çuar deri te liria. Për këtë arsye ne sot i vuajmë pasojat e kësaj dyfytyrësie politike”.
“Ata kanë promovuar një shtet të cilin liria dhe besimi janë të garantuara me Kushtetutë, por në praktikë është e kundërta. Edhe sot po ndodh me sloganet që i kanë partitë politike. Premtojnë drejtësi për krejt dhe shtet, por është e krejt e kundërta.
Kelmendi fajin për këtë po ua lë partive që kanë udhëhequr në vitet e pasluftës dhe duhet të mbajnë përgjegjësinë.
“Por, as Vetëvendosje nuk është më e mirë, e cila është puro në rrugën e PDK-së që kur synoi të ngjitet në pushtet në vitin 2007-2010 nuk la metodë pa shfrytëzuar që ta bindë opinionin për t’i fituar votat e besimtarëve myslimanë çka në praktikë e veproi të kundërtën. Pikërisht nga kandidati i PDK-së për kryeministër (Enver Hoxhaj) doli udhëzimi administrativ që ia ndalon mbulesën vajzave myslimane”.
Ai ka thënë në Edicionin e Analizës se edhe partia e Albin Kurtit do ta bëjë të njëjtën.
“Të njëjtën rrugë po e ndjekë sot Vetëvendosja me liderin e saj kur mundohet t’i afrojë besimtarët, që thotë populli me mjaltë prej goje, por në praktikë VV-ja për një mandat në Kuvendin e Kosovës bashkë me PDK-në kanë qenë dy paritë që i kanë kontribuar më së shumti diskriminimit të besimtarëve në vendin tonë”.