Ish presidenti i Shteteve të Bashkuara të Amerikës Donald Trump, është gjobitur për mosbindje ndaj vendimit të gjykatës pasi nuk ka dorëzuar dokumentet fiskale të cilat i ishin kërkuar. Ai do të paguajë 10 mijë dollarë në ditë deri sa të bindet, shkruan CNN.
Trump dhe dy fëmijët e tij më të mëdhenj, Ivanka dhe Donald Junior, u thërritën të dëshmonin nga prokuroria e përgjithshme e Nju Jork në fillim të muajit prill në procesin rreth çështjeve financiare të familjes.
Gjykata duhet të vërtetojë nëse Trump Organization ka ndryshuar vlerën reale të pronave të tij për të marrë kushte më favorizuese kreditimi, ose i ka fshehur për të përfituar një kursim fiskal. Hetimet janë hapur rreth një vit më parë nga prokuria e përgjithshme e Nju Jork, rreth perandorisë ekonomike dhe bizneseve të ish presidentit amerikan.
Hipotezat për krimet e mundshme kanë të bëjnë me evazionin fiskal dhe mashtrimin bankar, pasi janë dhënë vullnetarisht informacione të pasakta për pasurinë e tij. Një zëdhënëse e prokurorisë pohoi se hetimet tashmë janë penale. Hetimi i Nju Jork ndjek atë analog të nisur nga prokuroria e Manhatan që zgjati dy vite.
Trump reagoi duke mohuar cdo akuzë dhe duke e cilësuar të gjithë situatën si një gjueti shtrigash.