Drejtori i të ashtuquajturës “Zyra për Kosovën” në qeverinë e Serbisë, Marko Gjuriq, ka reaguar ashpër pas deklarimeve të kreut të Lëvizjes Vetëvendosje, se “Serbët e Kosovës pajtohen me mua, por frikësohen nga Serbia që ta pranojnë”.
Gjuriq thotë se komuniteti i komunave serbe duhet që në mënyrë urgjente të reagojë dhe ta ruajë veten nga, siç ka thënë ai, “një abuzues siç është Kurti”, shkruajnë mediat serbe.
Politikani serb thotë se fakti që Kurti deklaron se nuk e dëshiron formimin e Asociacionit, është një tregues që ai dëshiron ta shndërrojë popullin serb në një kolektiv pa asnjë të drejtë.
Tutje Gjuriq ka komentuar edhe deklarimet e Kurtit rreth Nenad Rashiqit dhe Rada Trajkoviqit se “flasin e veprojnë sikur të ishin shqiptarë”.
“Dëshira më e madhe e Kurtit është që serbët t’i bëhen bashkëpunëtorë në ëndrrat e tij për Shqipërinë e Madhe, por ato ëndrra janë të kota”, ka thënë Gjuriq.
Tutje ai ka thënë se serbët janë duke u bashkuar krah Listës Serbe, pasi që sipas tij ata janë në dijeni që “politikanët si Kurti janë kërcënim serioz për mbijetesën e tyre në Kosovë”, ka shtuar ndër të tjera.