Anëtari i Partisë Demokratike të Kosovës (PDK), Bekim Haxhiu, ka reaguar në lidhje 17 vjeçarin nga Graçanica, Ilija Iviç, i cili zgjodhi të luaj për Kombëtaren e Kosovës në futboll, gjë për të cilën Komuna e Graçanicës ia largoi të dy prindërit nga puna, transmeton Gazeta Metro.
Me anë të një postimi në Facebook, Haxhiu tha se ky futbollist bëri atë që pak njerëz e kanë pritur, tejkaloi paragjykimet e deritanishme duke vendosur ta përfaqësojë shtetin e tij në futboll.
Mirëpo, Haxhiu karshi kësaj ka kritikuar veprimet e institucioneve të Kosovës, për të cilat thotë se nuk ishin në nivel të përgjegjësisë ndaj vendimit madhor të futbollistit Ivic.
Ai tutje tha se Qeveria e re me në krye Albin Kurtin, duhet të përcaktojë se a është me futbollistin Ilija Ivic apo me Listën Serbe.
Postimi i plotë:
“Mos vajtoni por veproni, tregoni me kë jeni, me futbollistin Ilija Iviq apo me Listën Serbe?!
Futbollisti Ilija Iviq bëri atë që shumë pak njerz e kanë pritur, ai tejkaloi paragjykimet e deri tanishme dhe vendosi të përfaqësoj në futboll shtetin e tij, Republikën e Kosovës.
Pas kësaj, përfaqësusit e Listës Serbe që janë në udhëheqje të Komunës së Graqanicës larguan nga puna prindërit e tij.
Veprimet e mëpasshme të institucioneve të Kosovës nuk ishin në nivel të përgjegjësisë karshi vendimit madhor të futbollistit Iviq. Nuk mjafton lëshimi i një kominikate nga Qeveria dhe FFK në përkrahje të futbollistit dhe familjes Iviq, por kërkohet të ketë veprime dhe mbështetje konkrete ligjore.
Prindërit e futbollistit Ilija Iviq janë larguar nga puna nga udhëheqësit e Listës Serbe, të cilët janë pjesë e Qeverisë Kurti.
Andaj, Qeveria Kurti duhet të përcaktohet se a është me futbollistin Ilija Iviq, i cili do të përfaqësoj Kosovën në kombëtaren U19, apo me Listën Serbe, udhëheqësit e të cilëve në Graqanicë larguan nga puna prindërit e futbollistit Ilija Iviq, për shkak se djali i tyre ka vendosur të përfaqësoj shtetin e tij, Kosovën.
Qeveria duhet të përcaktohet se cilin vendim e përkrah, atë të futbollistit Ilija Iviq apo vendimin e Komunës së Graqanicës e cila largoi nga puna prinderit e futbollistit Iviq.
Komunikata verbale pa veprime konkrete e Qeverisë Kurti është aprovimi i vendimit të Komunës së Graqanicës e cila udhëheqet nga Lista Serbe.
Veprimi i institucioneve të Kosovës duhet të jetë efikas në mbështetje të familjes së futbollistit Ilija Iviq.
Albin Kurti duhet të tregoj se me kë është, me familjen e futbollistit Ilija Iviq që dëshiron të përfaqësoj Republikën e Kosovës, apo me Listën Serbe e cila nuk e njeh Shtetin e Kosovës dhe për më keq i ndëshkon serbët që Kosovën e njohin shtet të tyre.
Prandaj duhet veprim konkret i Qeverisë, mos vajtoni por veproni, tregoni me kë jeni, me futbollistin Ilija Iviq apo me Listën Serbe?!”.