Gazmend Pula, ish-ambasadori i Kosovës në Shqipëri po e përkrahë Rusinë në konfliktin e nisur me Ukrainën. Ndonëse e gjithë bota po e cilëson Rusinë si agresor e Ukrainën VlKTlME.
Kjo vërehet sapo të hysh në profilin e ish-ambasadorit në Facebook. Pula mbështet haptazi Rusinë, gjegjësisht shkrimet pro-ruse.
Në njërin nga shkrimet e tij ai ka shpërndarë një video ku shihen trupa ruse në krye me kreun e republikës ruse të Çeçenisë, Ramzan Kadyrov. Teksa i gëzohen pushtimit të Mariupolit (qytet në Ukrainë).
“Trupat çeçene të Ramazan Kadyrov festojnë çlirimin e Mariupolit”, thuhet në videon e shpërndarë nga ish-ambasadori.
Ndërkohë në postimin e 7 prillit, Pula ka shpërndarë televizionin rus, “Russia Today TV”, duke thënë se “mund ti ndalin rrjetet sociale, por nuk mund ta ndalin të vërtetën”.
Teksa bën thirrje që të ndiqet ky televizion në platforma të ndryshme. Televizion ky që shquhet për propagandë e dezinformat.
Ndërkohë, Bashkimi Evropian ka ndaluar mediat ruse të lajmeve Russia Today dhe Sputnik. Lajmin në muajin shkurt e bëri të ditur kryediplomati, Josep Borrell.
Bllokimi sipas Borrell po bëhej në mënyrë që të ndalohet e të luftohet dezinformimi rus.
“Sot ne po ndërmarrim një hap vendimtar për të mbyllur transmetimin për manipulimin e informacionit të rusëve në Evropë, duke ndaluar transmetimin e Rusisë Sot dhe Sputnik në Bashkimin Evropian”, tha Borrell përcjell Insajderi.
Përkrahja pro Rusisë e ish-ambasadorit vërehet edhe përmes komenteve që bën me ndjekësit e tij.
Në videon ku ka shpërndarë kreun çeçen, ku shihet me ushtarë rusë teksa festojnë për siç thonë ata “çlirimin” e Mariupolit.
Sipas tij Ukraina është një vend i shkretë e që ndodhën në këtë situatë për shkak të amerikanëve. Apo siç i quan ai “skifterët oligarkiko neokon të kompleksit ushtarako industrial Amerikano-hebrejit në luftë”.
“…për qëllime dhe nevoja të veta të tentim dominimit imperial të vazhduar të botës, në këtë fazë duke e futur Ukrainën në gojë të Arushës ruse, duke ja deleguar luftën mercenare kundër Rusisë…!”, ka shkruar ai.
E fajin për shkatërrimin e Ukrainës sipas ish-ambasadorit nuk e ka Rusia. Por liderët e Ukrainës duke nisur nga presidenti, Volodymyr Zelenski, i cili që nga dita e parë e konfliktit ka qëndruar në krye të shtetit të tij.
“Së bashku me ato kukullat e tyre si Zelenski, Poroshenko, Timoshenko, Jushqenko, Kuchka, etj etj që e shkatërruan shtetin dhe popullin e Ukrainës”, thuhet në komentin e tij.
Ndërkaq, Shtetet e Bashkuara sot kanë ndarë 332 milionë dollarë ndihmë ushtarake për Ukrainën nga 770 sa ndanë gjithsej.
Më poshtë gjeni disa nga shkrimet e shpërndara nga Gazmend Pula, ku shihet teksa ky i fundit i quan mercenarë ushtarët Ukrainas që po luftojnë për vendin e tyre.
Gazmend Pula ka shërbyer si ambasador i Kosovës në Shqipëri në vitet 2009-2010. Dha dorëheqje për shkaqe shëndetësore.
“Në aktin e dorëheqjes, z. Pula njofton Presidentin se dorëheqja bëhet për shkaqe shëndetësore”, thuhej në njoftimin e datës 23 gusht 2010.