Ish-ministri i Integrimeve Evropiane, Blerim Reka, ka thënë se Serbia ka filluar tash e dy vite ta kopjojë botën ruse, me projektet e saj.
Reka ka thënë në “Interaktiv” të KTV-së se Serbia e kopjon botën ruse pikërisht në të ashtuquajtrën problematizimi i “shkeljes së të drejtave të serbëve jashtë Serbisë”, në mënyrë që siç ka thënë, të merret pretekst për të intervenuar në ato shtete.
“Serbia ka filluar tash dy vite ta kopjojë botën ruse me projektet e saj. Copy-paste i botës ruse në të ashtuquajturën botën serbe është problematizimi i “shkeljes së të drejtave të serbëve jashtë Serbisë” në mënyrë që të merret pretekst për të intervenuar në ato shtete, siç po bën Rusia tash e sa vite në Gjeorgji, Kazakistan, Ukrainë e kështu më radhë. E pamë çka ndodhi në gusht me të ashtuquajturën diplomaci kishtare serbe, me inaugurimin e patriarkut në serb në Mal të Zi. Po shikojnë se çka po ndodh me Bosnjë Hercegovinën dhe Republikën Srpska. Është për tu habitur se si BE-ja lejon një shtet kandidat që është Serbia, jo vetëm që të zhvillojë negociata, por edhe e shpërblen, në dhjetor të vitit të kaluar, në Samitin e fundit të Këshillit Evropian, si të vetmin shtet për të hapur kaptina të reja negociuese me BE-në, i cili nuk e zbaton as 43% të politikës së përbashkët të jashtme të sigurisë së BE-së, nuk aplikoi tash e 8 vite asnjë nga sanksionet ekonomike ndaj Rusisë, blen armatim rus, shfrytëzon kreditë kineze jashtë rregulloreve dhe direktivave për treg të lirë të BE-së. Unë nuk di se çka mund të bëjë me tej BE-ja se kjo për ta dënuar si një shtet jo që nuk sillet si shtet kandidat i BE-së por është pikërisht me një këmbë në të ashtuquajturin Union Euroaziatik të Putinit, e në anën tjetër negocion për Unionin Evropian”, ka thënë Reka.