Shumë është folur për karvanin e gjatë disa dhjetëra kilometra me ushtarë dhe armë të rënda ruse që po avancojnë prej disa ditësh drejt Kievit.
Por një tjetër karvan, ai me ushtarë rusë të eleminuar, raportohet të jetë formuar nga Ukraina drejt një qyteti kufitar bjellorus.
Trupat e pajetë e ushtarëve rusë të eleminuar në Ukrainë po dërgohen në Rusi përmes Bjellorusisë, me trena dhe avionë, në një operacion të fshehtë për të mos tërhequr shumë vëmendjen, raportojnë mediat ndërkombëtare.
Në një video të publikuar nga Radio Europa e Lirë, duket një karvan me ambulanca ushtarake që po udhëtojnë përmes qytetit bjellorus Homel.
Video raportohet të jetë realizuar në fillim të marsit dhe punonjës të një spitali rajonal aty pranë thonë se deri më 13 mars kanë dërguar në Rusi rreth 2500 trupa të ushtarëve rusë të eleminuar në Iuftime në Ukrainë.
Ushtria e Ukrainës thotë se që prej nisjes së pushtimit, 14 mijë ushtarë rusë kanë humbur jetën, por Departamenti Amerikan i Mbrojtjes, në një raport zyrtar, vlerëson se numri i viktimave është rreth 7000. Nga ana e saj, Ministria ruse e Mbrojtjes thotë se ka humbur vetëm 500 ushtarë në këtë Iuftë.
Banorët e qytetit bjellorus janë befasuar nga numri i ushtarëve të eleminuar që po ngarkohen stacionin e trenit, një mjek në spitalin kryesor të Homelit tha se nuk kishte mjaftueshëm kirurgë për të operuar të plagosurit dhe se po dërgoheshin në shtëpi të sëmurët vendas, për të liruar shtretërit.
Homel është qytet kufitar me Ukrainën në jug dhe Rusinë në lindje, dhe është qyteti i dytë më i madh i Bjellorusisë, pas Minskut, si dhe një nyje kyçe transporti dhe tregtie. Presidenti i vendit, Alexander Lukashenko, është aleat i Putinit dhe ka lejuar trupat ruse të futen në Ukrainë nga shteti i tij.