Pak ditë pas anëtarësimit në Lëvizjen Vetëvendosje, Flamur Maloku është shkarkuar nga pozita që mbante në Ministrinë e Kulturës, Rinisë dhe Sportit, e cila udhëhiqet nga Kujtim Gashi i PDK-së.
“Të dashur miq! Sot, në mënyrë të befasishme dhe krejt të njënashme, isha shkarkuar nga Këshilli i Librit në kuadër të Ministrisë së Kulturës, Rinisë dhe Sportit ku kam qenë anëtar i këtij këshilli në cilësinë e kritikut letrar”, ka shkruar në “Facebook”, Flamur Maloku.
“Gjatë kësaj kohe, me përgjegjshmëri dhe këmbëngulje, kam kërkuar që të respektohet ligji për veprimtarinë botuese dhe kam arritur që përmes insistimit të vazhdueshëm të respektohet ligji dhe vetëm ligji, për gjithë botuesit e Republikës së Kosovës”, thuhet tutje në reagimin e anëtarit të Vetëvendosjes.
Madje, Flamur Maloku e ka quajtur këtë edhe hakmarrje politike ndaj tij.
“Shihet qartë se ky vendim tepër i nxituar dhe i pabazë është tërësisht një hakmarrje politike që ngjet fill pas aderimit tim në Lëvizjen Vetëvendosje”, ka deklaruar Maloku.
“Asnjë presion i pushtetit, sado i dhunshëm qoftë, nuk do ta ndal të drejtën e popullit që të pozicionohet kah kauza anti-krim, që ka vënë në zgrip të sotmen dhe ardhëmrinë e shtetit të Kosovës. Asnjë pushtet, që bart vulën e krenarisë boshe, nuk mund ta ndal revoltën e popullit për më shumë drejtësi e mirëqenie. Askush nuk mundet të luaj në kurriz të popullit, që aspiron për liri dhe demokraci”, thuhet tutje në reagimin e tij.
Ai ka thënë se do ta vazhdojë angazhimin e tij në partinë e Vetëvendosjes.
“Këto veprime absurde dhe pa bazë ligjore të pushtetit nuk do të ndalin veprimtarinë time politike në Lëvizjen Vetëvendosje, përpjekjen time si qytetar i angazhuar për ta shpëtuar shoqërinë prej kapjes dhe poshtërimit që ky pushtet bajarktarësh e cubash, i ka bërë kësaj shoqërie përmes përdorimit të metodave të hakmarrjes që mund të reflektojnë frikë. Por, ky popull, le ta dinë mirë pushtetarët e sotëm dhe të nesërm, nuk mund të ketë frikë. Koha e së keqes po mbaron, është në regtimat e fundit, koha e së mirës po vjen. Askush nuk mund ta pengojë këtë të mirë të përbashkët, për qytetarët dhe atdheun tonë të shtrenjtë. As autokracia e pushtetit si urdhërat për hakmarrje ndaj së cilit prej nesh që shpreh hapur se KOHA për Vetëvendosje e Drejtësi erdhi dhe koha e mashtrimit do të mbetet një e kaluar e hidhur e kombit dhe shoqërisë”, thuhet në fund të reagimit.