Kryetari i Kuvendit të Kosovës, si dhe anëtari i kryesisë së Vetëvendosjes (VV), Glauk Konjufca, ka thënë se ai kishte pritur që kjo parti të fitonte së paku gjashtë komuna në zgjedhjet lokale.
Këto deklarime Konjufca i bëri në KTV, ku tha se minimumi ka pritur që VV do t’i fitojë 6 komuna.
“Unë kam menduar se minimumi Vetëvendosja do të duhej të fitonte 6 komuna. Nuk kam pasur emra. Por mendoj se Vetëvendosja tradicionalisht ka qëndruar mirë në qendrat e mëdha urbane, le të themi në 7 qytetet kryesore”, ka thënë ai.
Ai ka thënë se Vetëvendosja është e fortë e votohet tradicionalisht aty ku dora e pushtetit ka më pak fuqi për të kushtëzuar, e që thotë se janë qendrat urbane.
Konjufca thotë se ndër arsyet që mund të ketë ndikuar në rezultatin e pakënaqshëm është se ndoshta edhe nuk është prezantuar si duhet puna e mirë e Qeverisë.
“Mendoj se refleksioni duhet të shkojë në nivel të asaj, që edhe në nivel lokal me ndërtuar strategji nga fillimi, por edhe në nivel qendror punët e mira të Qeverisë të jenë më të dukshme. Strategji që prezanton punët e mira që po bën kjo Qeveri e që janë të nevojshme”, tha ai.
Ndryshe VV në zgjedhjet lokale fitoi 4 komuna: Gjilanin, Podujevën, Kamenicën edhe Shtimen.