Kryesindikalisti i afërt me VV-në në RTK, Fadil Hoxha, ishte akuzuar nga qindra punëtorë të RTK-së për keqpërdorime të fondeve të sindikatës.
Kohë më parë ai është akuzuar nga 109 punonjës të RTK-së për keqpërdorime financiare bashkë me kryesinë e atëhershme të sindikatës së punëtorëve të RTK-së.
Në një email të siguruar nga redaksia e portalit Ballkani.info, ky grup i punonjësve e akuzonte Fadil Hoxhën për fshehje të keqpërdorimeve financiare, për manipulim me listat zgjedhore për zgjedhjen e kryetarit të sindikatës dhe për “privatizim” të sindikatës.
Lista e siguruar me emra të njohur për redaksinë, është e nënshkruar nga secili prej 109 punonjësve.
Sipas kësaj sindikate, Fadil Hoxha dhe kryesia e atëhërshme kishin keqpërdorur mjetet e anëtarësisë për një udhëtim në Radhime të Shqipërisë.
Ky numër mjaft i madh i punonjësve kishte kërkuar që të ndërpritet anëtarësia e tyre për sindikatën e drejtuar nga Fadil Hoxha.
Kujtojmë se Fadil Hoxha vazhdimisht në statuset e tij në Facebook ka qenë shumë i zhurmshëm ndaj keqpërdorimeve, por në bazë të listave te siguruara nga Ballkani, ai vet përfolet si pjesë e keqpërdorimeve.
