Gjykata Kushtetuese sot në një seancë publike do të diskutojë për ligjshmërinë e votës së deputetit Etem Arifi.
LVV-ja është ankuar në Kushtetuese pas votimit të Qeverisë Hoti nën pretendimet se kjo qeveri është jolegjitime, pasi që votën e 61-të pro saj e ka dhënë deputeti Etem Arifi, i dënuar me vendim të prerë nga Gjykata.
Seanca pritet që të nis në ora 10:00 derisa shkaku i pandemisë do të mbahet përmes një videokonference.
Nuk dihet se sa do të zgjasë e njejta, veçse sipas procedurave, vendimi përfundimtar mund të jepet nga Kushtetuesja edhe sot gjatë ditës.
Në momentet kur në Kushtetuese do të diskutohet për këtë çështje, Hoti do të jetë në një aktivitet në Istog.
Kështu është bërë e ditur përmes një njoftimi për media nga Qeveria.
“Agjenda e Kryeministrit të Republikës së Kosovës e datës 02.12.2020 .1.Kryeministri Avdullah Hoti merr pjesë në ceremoninë e inaugurimit të Kompleksit Memorial ‘’Dr. Ibrahim Rugova’’, thuhet në njoftim.
Dje kryeministri i Kosovës Avdullah Hoti është pyetur për seancën e sotme dëgjimore në Kushtetuese lidhur me shqyrtimin e kërkesës së Lëvizjes Vetëvendosjes.
Hoti tha se nuk shqetësohet nëse rrëzohet qeveria që ai e drejton, por që shtoi se hall të vetëm ka menaxhimin e situatës me pandeminë COVID-19.