Edhe profesori i Filozofisë Blerim Latifi, ka reaguar për ndërtimin e Xhamisë së Madhe në Prishtinë.
Ai ka kujtuar se edhe në të kaluarën, në Prishtinë janë ndërtuar tempuj fetarë, për të dhënë mesazhe politike e dëshmi të pushtetit mbi një vend, se sa për t’u shërbyer nevojave të besimtarëve të thjeshtë.
Sipas tij, presidenti turk Rexhep Tayip Erdogan po e ndërton xhaminë e re në Prishtinë për të dhënë mesazhin se Kosova është nën hijen e Turqisë, përcjell Bota sot.
Postimi i plotë i Latifit në Facebook:
Kushdo që ka pak njohuri nga historia e civilizimeve e di se tempujt e mëdhenj fetarë më shumë ndërtohen për të dhënë mesazhe politike e dëshmi të pushtetit mbi një vend, se sa për t’u shërbyer nevojave të besimtarëve të thjeshtë. Që nga tempujt e Karnakut në Egjiptin e Lashtë e deri me sot kështu ka qenë.
Nga ky rregull nuk bën përjashtim as historia jonë.
Nuk bën përjashtim as kjo historia e tempujve në qendër të Prishtinës.
Milosheviqi e ngriti kishën ortodokse serbe m’u në mes të Prishtinës për të dhënë mesazhin se Kosova është Serbi.
Pas luftës, Ibrahim Rugova e ngriti katedralën katolike për t’i thënë botës së Kosova është pjesë e Civilizimit Perëndimor.
Sot, Erdogani po e ndërton xhaminë e re në Prishtinë për të dhënë mesazhin se Kosova është nën hijen e Turqisë. Kjo është e gjitha. Të tjerat janë rrëfime të kota.