Edhe pse Gjykata Kushtetuese ka edhe 8 ditë kohë për të vendosur lidhur me mandatimin e Avdullah Hotit për kryeministër, LDK-ja e Isa Mustafës thotë se javën e ardhshme do të krijohet qeveria e re.
Shefi i Grupit Parlamentar të LDK-së, Arben Gashi, ka deklaruar për media se java tjetër do të formohet qeveria e re.
“Java e ardhshme do ta zë Kosovën me qeveri të re”, tha ai, shkruan Reporteri.net.
Kur u pyet se Kushtetuesja ka afat edhe 8 ditë kohë për të dhënë mendimin, Gashi tha sigurisht se do ta jape para date 29 maj.
“Nuk kam informacione, por maksimalisht i ka 8 ditë, vendimi del para të premtes (së ardhshme). Ne jemi të gatshëm. Në momentin që del vendimi i Gjykatës Kushtetuese do ta riaktivizoj ftesën për seancë të jashtëzakonshme dhe kjo nuk do të zgjatë më shumë se 24 orë”, tha ai.