Ende pa u qetësuar situata që shkaktoi ardhja e tij nga Zvicra në Kosovë, deputeti i AKR-së, Behgjet Pacolli, ka kërkuar leje nga Ministria e Infrastrukturës dhe Ambientit që të kthehet në Lugano me avionin e tij personal.
Burime brenda MIA-s tregojnë për KOHËN se Pacolli ka kërkuar leje për fluturim nga Aeroporti I Prishtinës dhe se ajo i është aprovuar. Sipas burimit, Pacolli pritet që sot rreth orës 14:00 të niset me aeroplanin e tij privat për në Zvicër.
Këshilltari i tij, Jetlir Zyberaj, nuk e ka konfirmuar lajmin, por ai ka kërkuar edhe pak kohë për “këtë çështje”. Kthimi i ish-ministrit të Punëve të Jashtme shkaktoi bujë të madhe javën që shkoi. Ai kërkoi të kthehej direkt në Kosovë nga Lugano.
Mori dy herë leje dhe dy herë e anuloi atë. Më pas kthimin e bëri përmes Tiranës. Kërkesa e Pacollit për aterrim në Aeroportin e Prishtinës u përcoll edhe me kërkesën që të mos futej në karantinë, si çdo qytetar që vjen nga jashtë në këtë kohë pandemie.
Më pas, Pacolli erdhi nga Tirana, po ashtu me aeroplan privat, dhe u vendos në shtëpinë e tij në Hajvali. Sipas Ministrisë së Punëve të Brendshme, ai duhet të qëndrojë në vetizolim 14 ditë. Me të arritur në Prishtinë, Pacolli e akuzoi shtetin e Kosovës se për një moment ishte frikësuar “nga një sulm terrorist” ndaj tij.
Pacolli është kthyer nga Zvicra pas thirrjes së mbledhjes së jashtëzakonshme të Kuvendit të Kosovës për votimin e qeverisë së re. Por, mbledhja u shty pasi Gjykata Kushtetuese e pezulloi deri më 29 maj dekretin e presidentit Hashim Thaçi për mandatimin e Avdullah Hotit për kryeministër.