Në mbledhjen e seancës emergjente të Asamblesë së Përgjithshme të Organizatës së Kombeve të Bashkuara, ambasadori i Ukrainës Sergiy Kyslytsya e hapi fjalimin me porosinë e fundit që ushtari rus i kishte dërguar nënës së tij pak para se të vritej në betejë me ukrainasit.
Në përpjekje për të ilustruar dyfytyrësinë e Rusisë në invadimin e Ukrainës, diplomati Kyslytsya lexoi një letër prekëse të ushtarit rus për nënën e tij. Ushtari rus sipas fotografisë së këtij komunikimi të nxjerrë nga telefoni mobil i ushtarit pasi që vdiq në betejë me ukrainasit, ankohej se i kishin gënjyer dhe se këtu nuk i mirëpret askush.
Kyslytsya e nisi fjalimin në anglisht por e lexoi komunikimin mes ushtarit rus dhe nënës së tij në rusisht.
“Aljosha, si je? Pse nuk ke shkruar tash e sa kohë? Me të vërtetë je ende në stërvitje?” E pyet nëna e ushtarit të vrarë rus në Ukrainë me tekst mesazh.
“Mama nuk jam më në Krime. S’jemi më në stërvitje” i përgjigjet i biri.
“Po ku jeni atëherë? Babi pyet nëse mund të të dërgoj një pako” vazhdoi e ëma.
“Çfarë pako mama mund të më dërgoni tani mama” reagon Aljosha.
“Çfarë po flet kështu, çfarë ka ndodhur?” vazhdoi e ëma me shqetësim.
“Mama unë jam në Ukrainë. Këtu ka nisur luftë vërtetë e tmerrshme. Kam frikë. Ne po bombardojmë të gjitha qytetet këtu. Madje edhe civilët i kemi në shënjestër. Ne na thanë që do na mirëprisnin. Ata po hidhen nën tanket tona për të na ndaluar. Po na quajnë fashistë. Mama është shumë keq e shumë vështirë këtu” këto ishin fjalët e fundit të ushtarit rus për familjen e tij para se të vdiste në betejë me ukrainasit pak më vonë, siç i lexoi ambasadori ukrainas në mbledhjen e OKB’së.