Delegacioni i Kosovës i përbërë nga ministrja e Punëve të Jashtme dhe e Diasporës, Donika Gërvalla, ministri i Mbrojtjes Armend Mehaj, ministri i Administrimit të Pushtetit Lokal Elbert Krasniqi, përfaqësues diplomatik të Kosovës në ShBA dhe përfaqësues të FSK-së, kanë vazhduar takimet zyrtare dhe pjesëmarrjen në aktivitete të ndryshme në Iowa, me rastin e shënimit të dhjetë vjetorit të Programit për Partneritet Shtetëror mes Kosovës dhe Iowa-s në sektorin e mbrojtjes.
Gjatë ditës së sotme janë pritur në takim nga Gjeneralmajori Benjamin Corell, komandant i Gardës Kombëtare të Iowa-s.
Me këtë rast ministrja Gërvalla shprehu falënderimin e Qeverisë së Kosovës për mbështetjen dhe bashkëpunimin e shkëlqyer që institucionet e Kosovës dhe FSK-ja ka me Gardën Kombëtare të Iowa-s nga e cila tha se ka përfituar mjaftë shumë vendi ynë. “Ky partneritet 10 vjeçar do të thotë shumë për Kosovën.
Është një kontribut tepër i madh drejt FSK-së e cila ka përfituar nga ky partneritet duke u zhvilluar dhe modernizuar dhe duke u bërë forcë e stabilitetit dhe paqes në rajon”, shtoi ajo ndër të tjera.
Më pas delegacioni i Kosovës mori pjesë në një konferencë tematike me përfaqësues të institucioneve të Iowa-s, duke përfshi Gjeneralmajori Benjamin Corell, qëllimi i së cilës ishte të diskutohej një strategji bashkëpunimi mes të dyja vendeve për një periudhë afatmesme, përmes projekteve të ndryshme në fushën e sigurisë.
Ministrja Gërvalla ka theksuar se Qeveria e Kosovës është shumë e përkushtuar që të thelloj bashkëpunimin me shtetin e Iowa-s si dhe ka përmendur shumë storie suksesi të cilat i arriti Kosova si rrjedhojë e këtij bashkëpunimi.
Pjesëmarrja e trupave të Forcës së Sigurisë së Kosovës në mision paqeruajtës në Kuvajt, ka thënë të jetë një prej atyre arritjeve që u mundësua krahas këtij bashkëpunimi.
Duke theksuar faktin që Kosova, është shndërruar në një faktor që prodhon siguri dhe paqe në rajon dhe më gjerë, Gërvalla ka përmendur edhe vendimin e institucioneve kosovare për strehimin e afganëve në Kosovë në bashkëpunim dhe koordinim me ShBA-të.
Po ashtu ka theksuar kontributin dhe përfshirjen e Kosovës në luftën kundër terrorizmit, radikalizmit dhe ekstremizmit të dhunshëm përmes afirmimit ligjor, qasjes strategjike, veprimeve ekzekutive dhe pjesëmarrjes aktive në Koalicionin global. Në këtë kuadër ka njoftuar të pranishmit për sanksionet e vendosura ndaj organizatava dhe individëve që cenojnë paqen dhe sigurinë në botë.
Delegacioni mori pjesë edhe në një pritje që u mbajt me pjesëtare të komunitetit të Iowa-s si dhe pjestarë të Gardës Kombëtare, ku patën rastin të zhvillojnë diskutime lidhur me bashkëpunimin mes të dyja vendeve e posaçërsisht arritjet e Kosovës në fushën ushtarake.