Deputetja nga radhët e Partisë Demokratike të Koosvës, Ganimete Musliu sot ka njoftuar se ka denoncuar në polici dy faqe të rrjetit social Facebook, “Qeveria Kurti” dhe “51% me Albinin”, të cilat thotë se kanë shpërndarë lajme të rreme mbi shëndetin e saj, shkruan Gazeta Sinjali.
Musliu përmes një postimi në Facebook është shprehur se këtë denoncim ka dashur ta bëjë edhe mbrëmë në foltoren e Kuvendit, por thotë se është penguar.
Më tej, ajo thotë se këto faqe janë të afërta me Lëvizjen Vetëvendosje dhe në bazë të informacioneve që ka pranuar, krijuesi i këtyre faqeve është Fitim Pacolli, vëllai i deputetes së VV-së, Fitore Pacolli.
“Mbrëmë nuk mu mundësua dhe u pengova që përmes foltores së Kuvendit të denoncoj këto lajme të rrejshme që kishin të bëjnë me shendetin tim dhe punën time në Kuvend dhe i kisha të paqartë reagimet e tyre dhe pengesen që mu bë. Sot e kam shumë të qartë se këto faqe janë të afërta me VV dhe në bazë të informacioneve dyshohet se krijuesi i këtyre faqeve është Fitim Pacolli- vëllai i deputetes Fitore Pacolli. Ju njoftoj se të hënën unë do të vazhdoj edhe me padi civile”, ka shkruar ndër të tjera Musliu