Kryetari i Lidhjes Demokratike të Kosovës, Isa Mustafa, ka veç një përgjigje për Haki Abazin e VV’së, i cili tha sot se Mustafa duhet të merret në pyetje për vrasjen e Ahmet Krasniqit dhe tre përqindëshin, shkruan Gazeta Express
Haki Abazi i Vetëvendosjes sot ka thënë se kreu i LDK’së, Isa Mustafa, duhet të merret në pyetje për rastin e vrasjes së Ahmet Krasniqit dhe Fondin e Trepërqindëshit
Por, kreu i Lidhjes Demokratike të Kosovës duket se nuk e ka ndërmend të merret më shumë me deklaratat e Abazit.
“Le të shkojë te doktori e të kontrollohet”, ka thënë Mustafa për Gazetën Express kur është pyetur se si i komenton deklaratat e Abazit ndaj tij.
Ndërkohë, Abazi ka thënë se Mustafa duhet të merret në pyetje nga Prokuroria e Shtetit, për njohuritë që sipas tij i ka për vrasjen e Ahmet Krasniqit dhe fondin e Trepërqindëshit.
Ai thotë se për t’u marrë në pyetje Mustafa, nuk ka nevojë për ndonjë gjykatë speciale.
“Isa Mustafa duhet të merret në pyetje nga prokuroria e shtetit për njohuritë që ka për vrasjen e Ahmet Krasniqit dhe gjithashtu për çështjen e fondit 3% që për herë të parë fondi shtetëror është kthyer në fond të UFORK…Nuk ka nevojë për gjykatë speciale për këtë gjë, drejtësia në Kosovë duhet të filloj të veproj”, ka shkruar Abazi.
“Sikleti i Mustafës duhet të adresohet për të lejuar kthimin e demokracisë dhe çkapjes së shtetit plotësisht”, ka përfunduar Abazi.
Ky reagim i Abazit ka ardhur pas një qëndrimi të djeshëm të Mustafës, ku tha se dialogu duhet të jetë i pavarur nga Gjykata Speciale.
Mustafa përmes një qëndrimi në Facebook, tha se është e rrezikshme për vendin vënia e dialogut me Serbinë ne kontekstin e Dhomave të Veçanta të Gjykatës Speciale.
“Gjykata duhet të jetë e pavarur në ndarjen e drejtësisë. Ashtu siç duhet të jetë dialogu i pavarur.
Logjika e parandalimit të ndonjë marrëveshje në Washington apo në Bruksel, nuk besoj se është dhe do duhej të jetë logjikë e një Gjykate. Sepse ajo duhet të ndajë drejtësi, për çfarë është themeluar”, shkruan Mustafa në Facebook.
Duke komentuar reagimet e fundit të Ëolfgang Petritschit, ish-i dërguari i posaçëm i Bashkimit Evropian për Kosovën në periudhën e viteve 1998-99, dhe Carl Bildtit, bashkëkryesues i Këshillit Evropian për Marrëdhënie të Jashtme, se iniciativa e Amerikës për dialogun Kosovë-Serbi po dështon për shkak të ngritjes së aktakuzës ndaj presidentit Hashim Thaçi, Mustafa ka thënë se është vështirë të niset dikush për të dialoguar me logjikën e komenteve të tyre.