Matthew Whitaker u përball me dy prej skandaleve të raportuara në media prestigjioze ndërkombëtare.
Njëri prej tyre kishte të bënte me përfshirjen e tij në një skemë mashtrimi, ku shumë veteranë kishin humbur kursimet e tyre, raportuar nga “The Guardian”, raporton KTV.
Tjetra aferë që kongresmeni Jamie Raskin ia përmend atëherë ushtruesit të detyrës së Prokurorit të Përgjithshëm, është një organizatë joqeveritare që Whitaker-i e udhëhiqte dhe ishte i vetmi i punësuar në të, por që kishte marrë donacione të dyshimta prej 1.2 milion dollarësh.
Në disa prej artikujve të fundit të Wall Street Journal-it, theksohet se Whitaker po hetohej nga FBI si pjesë e një kompanie nga Florida, me dyshimet për mashtrimin e miliona konsumatorëve.
Nënkryetari i PDK-së, Memli Krasniqi, për artikuj të tillë, ka thënë të jenë produkt i medieve që vijnë nga partitë kundërshtare në SHBA, në këtë rast, demokratëve.
Por se si ka përfunduar lobisti Whitaker në fushatën e PDK-së, Krasniqi nuk ka dhënë një përgjigje konkrete, por ka thënë se ka ardhur falë miqësive që i kanë në SHBA.
Pas pjesëmarrjes së Whitaker-it në takimet elektorale, që nga PDK-ja u trumbetua si përkrahje e shtetit amerikan për këtë parti, pati edhe një reagim të Ambasadës së SHBA-së në Kosovë, që ritheksoi neutralitetin e saj në garën zgjedhore.
Reagimin e ambasadës, të pritur e ka konsideruar Krasniqi, duke shtuar se nuk kanë pretenduar se SHBA-ja e do PDK-në, porse kjo e fundit e do më shumë Amerikën.
Whitaker, pas gati një viti në pozitën e Shefit të Stafit te Prokurori i Përgjithshëm, kishte zëvendësuar shefin e tij Jeff Sessions për pak muaj, para së të largohej nga aty më 14 shkurt të këtij viti.