Kryetari i AKR-së, Behgjet Pacolli, është shprehur i gatshëm që t’i japë pjesë nga programi i tij Qeverisë Kurti. Ai thotë se këtë e bën veç për hir të Kosovës.
“S’kemi kontakt me Kurtin. Kontaktet janë ndërprerë prej momentit kur ia kam dorëzuar detyrën në qeverisjen e parë, por jam i gatshëm t’iu jap pjesë të programit për hir të Kosovës, për arsye se te unë ndahet shapi prej sheqerit.
Kur flitet për interesat e Kosovës atëherë bien poshtë interesat ideologjike, partiake dhe personale.
Këto janë synimet e mia.
Nëse është diçka e mirë për Kosovën jam i gatshëm të kontribuoj edhe në të ardhmen”.
Pacolli në Klan tha se partinë e Kurtit e pa si bashkëpunëtore për implementimin e programit të tij qeverisës, për të cilin tha se ishte shumë ambicioz, por se për shkak të dallimeve ideologjike kjo tentativë s’u realizua kurrë.
“Ne me Vetëvendosjen kemi pasë një tentativë që të bashkëpunojmë në të ardhmen.
Kemi punuar në vitin 2016 që të harmonizojmë programet tona.
Kam qenë gati i bindur se mos Vetëvendosje është ajo partia e cila do të marrë shumëçka prej programit tonë dhe do ta ketë program të ardhshëm qeveritar.
Ne nuk patëm fat të bashkëpunojmë me Vetëvendosjen për shkak të problemeve ideologjike dhe u ndamë aty”.
Kryetari i AKR-së, po ashtu, tha se përkundër që ka qenë pjesë e qeverisjes në të kaluarën, nuk ka arritur të zbatojë planet e tij në mënyrën si ka dashur për të krijuar vendet e reja të punës.