Tashmë 31 fëmijë ukrainas janë bashkuar me familjet e tyre, pasi ishin rrëmbyer nga trupat rusë gjatë luftës.
Familjarët të cilët prisnin me padurim fëmijët e tyre pritën për orë të tëra në ankth për mbërritjen në vendin e tyre pas shumë kohësh.
Të përlotur ata përqafuan të vegjlit e tyre, të cilët prej kohësh nuk ishin pranë familjarëve të tyre.
Iniciativën për kthimin e fëmijëve tek familjarët e tyre e ka marrë organizata humanitare “Save Ukraina”.
Pas këtij misioni drejtuesi i shoqatës deklaroi se njëri prej misioneve u finalizua, pavarësisht vështirësive të panumërta.
“Rrugëtimi ishte i vështirë. Me çdo mision, numri rritet, njëkohësisht edhe numri i orëve që familjet shpenzojnë në këto raste. Për më shumë se 14 orë ka pasur marrje të shumta në pyetje”, Mykola Kuleba- drejtues i shoqatës “Save Ukraine”.
Sipas raportimeve fëmijët janë marrë në rajonet e Khersonit dhe Karkivit, por tashmë u kthyen në Ukrainë.
Ndarja e fëmijëve ukrainas nga familjet e tyre ka çuar në ngritjen e akuzave për krime luftë ndaj Presidentit rus Vladimir Putin.
Muajin e kaluar Gjykata Ndërkombëtare Penale lëshoi një urdhër arresti për krime lufte ndaj Presidentit rus dhe komisioneres për të Drejtat e Fëmijëve, lidhur me dyshimet për rolin e tyre në transferimin dhe deportimin e paligjshëm të fëmijëve nga territoret e pushtuara ukrainase drejt Rusisë.
Top Channel