Mediat sllovene zbuluan një skandal të madh financiar, ku dyshohet se u përfshi Robert Golob, kryetar i Partisë së Lirisë, së shpejti kryeministër i Sllovenisë.
Në këtë aferë, ku dyshohet për shpëlarje parash, u përmend edhe përfshirja e ambasadorit të Kosovës në Kroaci, Martin Berishaj.
Tash kur janë bërë më shumë se një javë qëkur mediat sllovene raportuan se ai ka bartur në para kesh rreth 600 mijë euro nga kompania e tij në Mal të Zi për tek politikani slloven, Qeveria e Kosovës, nuk ka marrë asnjë vendim për shkarkimin e tij.
Mosshkarkimi i Berishajt, sipas opozitës, e dëmton imazhin e Kosovës në arenën e huaj.
Kështu tha deputetja e LDK-së, Valentina Bunjaku.
Largimi i ambasadorit Berishaj, sipas Hajdar Beqajt të PDK-së, partisë tjetër opozitare, do t`i bënte nder Kosovës.
“Unë konisderoj se një shtet që i respkton demokracinë është veprim jo i matur mosdhënia e dorëheqjes, pavarësisht a është fajtor apo jo, sepse është bërë skandal diplomatik. Dorëheqja i bën nder Kosovës”, deklaroi Beqaj.
Ky u shpreh i bindur për diçka.
“Në kohën e Qeverisë Thaçi, ju siguroj, se çdo ambasador i cili do të përfshihej si Martin Berishaj në ndonjë aferë, do të shkarkohej pa u përkthyer lajmi akoma në shqip”, theksoi Beqaj për “Front Online”.
Martin Berishaj njihet si mik shumë i afërt i kryeministrit Albin Kurti.
Ai ka qenë ndër të parët që kishte shkuar për të festuar në selinë e LVV-së, pas fitores në zgjedhjet e vitit të kaluar.