Qeveria në detyrë e Kosovës ka ndarë 20 milionë euro nga Pakoja Fiskale Emergjente për subvencionimin e ndërmarrjeve publike.
Në mbledhjen e 33-të, Qeveria e Kosovës ka miratuar ndryshimin dhe plotësimin e Pakos Emergjente Fiskale.
“Qeveria ka miratuar edhe vendimin për ndryshimin dhe plotësimin e Pakos Emergjente Fiskale. Me ndryshimin dhe plotësimin e vendimit në mbledhjen e sotme, janë ndarë 20 milionë euro për subvencionimin e ndërmarrjeve publike që kanë vështirësi financiare për shkak të situatës së krijuar nga emergjenca e shëndetit publik dhe me qëllim të sigurimit të likuiditetit të tyre”, thuhet në njoftimin e qeverisë.
Qeveria ka bërë me dije përmes një komunikate për shtyp se “këto subvencione mund të kushtëzohen me reduktimin e ndarjeve buxhetore për vitin aktual dhe për vitet në vijim për ndërmarrjet publike”.
Përveç këtij vendimi, Qeveria në detyrë ka marrë edhe disa vendime të tjera në mbledhjen e 33-të të saj.