Kryeministri i Shqipërisë Edi Rama, ka thënë se Kosova duhet t’i përgjigjet pozitivisht strehimit të afganëve nëse kërkohet nga ana e Shteteve të Bashkuara të Amerikës.
Këtë deklaratë e dha me anë të një postimi në profilin e tij në Facebook.
“Nuk e di nëse amerikanët i kanë kërkuar edhe Kosovës të strehojë afganët që u ekspozuan si miq dhe mbështetës të ushtrive aleate; uroj që në rast se po, qeveria e Kosovës të përgjigjet pozitivisht, për nderin e saj e të Kosovës sigurisht. Por bëj me dije se në Samitin e NATO-s isha unë që e ngrita këtë shqetësim, për jetët e bashkëpunëtorëve afganë të Aleancës pas tërheqjes së saj nga Afganistani. Madje iu referova si shembull eksperiencës tragjike të kundërshtarëve të regjimit komunist në vendin tonë, që vrau, burgosi, torturoi, shkatërroi çdo armik të brendshëm pasi triumfoi mbi armiqtë e jashtëm dhe mbylli totalisht Shqipërinë, siç do të bëjnë së shpejti tanimë, talebanët me Afganistanin”.
Ditëve të fundit në mediat shqiptare ka qarkulluar një lajm se Shtetet e Bashkuara të Amerikës, kanë kërkuar nga Shqipëria dhe Kosova që të strehojnë afganët që janë duke luftuar me talebanët në vendin e tyre.
Se i është kërkuar strehimi i qytetarëve afganë nga ana e Shteteve të Bashkuara këtë e ka konfirmuar vetë i pari i qeverisë shqiptare.