Aktori dhe shkrimtari Çun Lajçi, është deklaruar për marshin e ditës së djeshme në Prishtinë.
Lajçi thotë se, kurrë më shuëm se dje nuk ishin shqiptarët bashkë, por pyet se a e fituan drejtësinë ata që janë prapa grilave?
Përmes një postimi në facebook, Lajçi kujton deklaratat e politikanëve që thoshin se ‘kush nuk e voton Gjykatën është tradhtar’, ndërsa ‘kush nuk marshon për çlirimtarët sot është tradhtarë’.
Aktori shton se mashtruan atëherë dhe mashtruan përsëri edhe sot.
“Kallxoni; – për çka marrshuet? Kundër kujt dolet n’shesh?
Kundër Amerikës që ishte pro gjykatës!
Kundër Hashimit që thoshte; – ai që asht kundër gjykatës, asht tradhëtar i këtij vendi!
A po dolet t’ia bani qejfin Memlit, që t’udhëtoi n’Hagë e t’iu hyjë n’hatër komandantëve!”, shkruan ai.
Postimi i plotë:
Kurrë ma shumë se dje, bashkë s’kemi qenë!
Por, a e fituen drejtësinë ata që janë prapa grilave?
Ata, të cilët me votat tona i çuem n’birucë, a e fituen drejtësinë me brohoritjet tona? Me pankartat tona!
– Kush s’e voton gjykatën asht tradhëtar i këtij vendi, thoshin çlirimtarët atëherë!
– Kush nuk marrshon për çlirimtarët sot, janë tradhëtarët e popullit, brohoritet tash e nji muej e ma shumë!
Mashtronin atëherë, mashtruet sot!
Populli që pret t’mendojnë të tjerët për te, leht manipulohet!
A iu treguet fëmijëve (t’paktën dje, ju që i moret me vete), se me votat tueja çlirimtarët u dërguen prapa grilave!
A ju treguet pse e votuet gjykatën dje dhe pse sot po protestoni!
Çka shpërlatë dje me pankarta e brohoritje “Liria ka emën”? – fajin tuej të djeshëm? Ndërgjegjën tuej për votimin e gabuem?
Kallxoni; – për çka marrshuet? Kundër kujt dolet n’shesh?
Kundër Amerikës që ishte pro gjykatës!
Kundër Hashimit që thoshte; – ai që asht kundër gjykatës, asht tradhëtar i këtij vendi!
A po dolet t’ia bani qejfin Memlit, që t’udhëtoi n’Hagë e t’iu hyjë n’hatër komandantëve!
A s’iu tha kush se dje mund t’iu keni ba ma shumë dam çlirimtarëve?
Qysh protestohet pa e ditë epilogun? Pa u shpallë faji i tyne!
Pse e zgjoni dyshimin n’pafajsinë? Pse i bani fajtor pa fillua gjykimi?
Dhe
Pse nuk protestuet n’pjesën e okupueme t’Mitrovicës e ti tregoni Evropës se këtu janë kriminelët e t’pafajshmit janë në Hagë!
I vetmi popull jemi që qullavemi për inatin e diellit. Përcëllohemi n’rreze për inatin e shiut! Thahemi e lagemi në të njejtën kohë, pa e ditë pse përcëllohemi e pse qullavemi!