Mihail Yurevich Afanasjev do të jetë ambasadori i ri i Rusisë në Tiranë.
Afanasjev i ka dorëzur letrat kredenciale tek presidenti i Shqipërisë Ilir Meta, më 16 nëntor.
Arritja në Tiranë e tij është pasqyruar edhe në faqen zyrtare të Ambasadës ruse.
“Në Tiranë ka mbërritur Ambasadori i ri i Federatës Ruse në Republikën e Shqipërisë, z.Mihail Afanasiev. Z.Afanasiev ka lindur në vitin 1954. Karrierën diplomatike e filloi në vitin 1980. Ai ka punuar në Aparatin qendror të Ministrisë së Punëve të Jashtme të Bashkimit Sovjetik (BRSS) dhe Federatës Ruse, si edhe në përfaqësitë diplomatike jashtë shtetit. Në vitet 2005-2010 ka shërbyer si Ambasador i Rusisë në Etiopi. Para emërimit të Tij në Shqipëri ka drejtuar një nga departamentet e MPJ-së. Është i martuar, ka një vajzë”, shkruhet në biografinë e ambasadorit Afanasjev njofton Top Channel përcjellë Klan Kosova.
Ndonëse pa shumë detaje lidhur me karrierën e tij, Top Channel ka siguruar disa informata shtesë lidhur me biografinë e diplomatit nga Rusia.
“Përpara se të mbërrinte në Tiranë, Mihail Yurevich Afanasjev ka drejtuar Departamentin për Informacionin Mbështetës në Ministrinë e Jashtme ruse. Edhe pse informacionet mbi aktivitetin dhe fushat që mbulon ky department janë të pakta, mësohet se një prej objektivave kryesor të punës është siguria e informacionit “.
Afanasjev ka udhëhequr disa reforma për forcimin e sigurisë të informacionit dhe teknologjisë në Ministrinë e Jashtme ruse.
Njohës i gjuhës angleze dhe franceze, Mihail Yurevich Afanasjev ka qenë këshilltar në Ambasadën e Rusisë në Paris në vitet 1995 – 1999, ndërsa në 1993 – 1994 ka qenë drejtor i Departamentit për Afrikën dhe Lindjen e Mesme në Ministrinë e Jashtme.