Anipse Bashkimi Evropian ka hapur dyert për Serbinë, kjo e fundit duket se gjendet në situatë të vështirë me koronavirus.
Për këtë arsye, Presidenti Aleksandër Vuçiq pritet të marrë masa të ashpra që mund të shkojnë deri në izolimin e kryeqytetit. Rekomandimi është bërë nga grupi për menaxhimin e krizës, ndërsa Vuçiq pritet të deklarohet sonte në mbrëmje.
Situata epidemiologjike në Beograd nuk është aspak favorizuese pasi nga të dhënat rezulton se, nga testimet e 24 orëve të fundit, më shumë se 80% e të infektuarve janë nga Beogradi.
Në 24 orët e fundit në Serbi janë zbuluar 272 raste të reja me COVID-19 nga testimi i mbi 8 mijë personave. Në të gjithë vendin aktualisht janë 1 783 raste aktive ndërsa 73 persona janë në respirator. Në total, deri tani Serbia ka pasur 14 836 raste me koronavirus, ndërsa numri i vdekjeve është 281 persona.