Tre zyrtarë policorë të stacionit policor të Podujevës, janë suspenduar mbrëmë për shkak të dyshimit se nuk kanë përmbushur detyrat zyrtare me rastin e ndërhyrjes në një aheng familjar-dasmë, i cili mbahej në një restorant duke shpërfillur vendimin e qeverisë.
Burime të Gazetës Sinjali konfirmuan se zyrtarët policorë ishin dërguar nga Qendra e Kontrollit për të shpërndarë dasmorët dhe në koordinim me inspektoratin relevant të ndërmerrnin edhe masa ndëshkuese.
Përkundër udhëzimeve të qarta nga menaxhmenti, të njëjtit kishin dështuar për të ndërmarrë veprimet e ligjshme në përputhje me planin operativ të policisë dhe vendimet e qeverisë.
Gazeta Sinjali mëson se suspendimi është realizuar me kërkesën e Inspektoratit Policor të Kosovës dhe është vendosur nga drejtori rajonal i Policisë së Kosovës.
Kujtojmë se edhe dje, dy zyrtarë policorë janë suspenduar pasi të njëjtit dyshohet se nuk ndërmorrën veprimet e nevojshme zyrtare për të inicuar procedurë kundërvajtëse ndaj një subjekti afarist.