Prokurori i Specializuar ditë më parë propozoi aktakuzë ndaj presidentit të vendit, Hashim Thaçi dhe kryetarit të PDK-së, Kadri Veseli. Njohësit e rrethanave të drejtësisë dhe politikës mendojnë ndryshe sa i përket dorëheqjes eventuale të Thaçit nga pozita e presidentit.
Betim Musliu nga Instituti i Kosovës për Drejtësi, thotë për KosovaPress se pavarësisht që Kushtetuta e vendit nuk e obligon për një veprim të tillë, do të ishte e pahijshme për vendin të udhëhiqet nga një lider institucional, për të cilin rëndojnë akuza për krime lufte.
“Konsiderojmë që dorëheqja e presidentit Thaçi është e pashmangshme duke pasur parasysh integritetit e institucioneve dhe vet Republikës së Kosovës, i cili do të dëmtohej nëse presidenti Thaçi në një akuzë ende të pakonfirmuar do të qëndronte në pozitën e presidentit të Kosovës.
Thjesht sjellja e presidentit tani duhet të ishte dinjitoze në mënyrë që të jap dorëheqje për të ruajtur dinjitetit e institucionit të presidentit, dhe po ashtu imazhin e Kosovës në faktorin ndërkombëtar.
Do të ishte e pahijshme që një shtet si Kosova të udhëhiqej nga një lider institucional cili ka një aktakuzë edhe pse ende të supozuar, të pakonfirmuar. Por mbi të rëndojnë akuza krime lufte”, thotë ai.
Por, ndryshe mendon analisti politik, Ramush Tahiri, u shpreh se dorëheqja nga pozita e presidentit duhet të vijë pasi të konfirmohet aktakuza nga Dhomat e Specializuara të Kosovës, me seli në Hagë.
“Hashim Thaçi në momentin që ngritët aktakuza tash është propozim aktakuzë, që e pranon gjyqtari, duhet të jap dorëheqje.
Disa thonë që është akt moral, unë them që është akt ligjor.
Në Kushtetutën e Kosovës, në kompetencat e kryeministrit dhe presidentit thuhet se nëse ngritët aktakuza nga Gjykata ndërkombëtare e Hagës dhe gjykata të këtij rangu, personi që e mban detyrën duhet të jep dorëheqje, të lirojë funksionin në mënyrë që atje të ballafaqohet si person privat.
Unë mendoj dhe besoj se Hashim Thaçi kështu do të sillet”, thotë ai.
Pavarësisht kësaj, të parit të shtetit, Hashim Thaçi nuk i obligohet të japë dorëheqje në bazën ligjore dhe Kushtetuese.
Nga IKD-ja, Betim Musliu thotë se nuk ekziston asnjë kompetencë në Kushtetutë që e detyron Thaçin të japë dorëheqje.
“Ne vlerësojmë që asnjë kompetencë nuk ekziston në Kushtetutën e Kosovës që e detyron presidentin e Kosovës që në këtë periudhë të japë dorëheqje”, thotë ai.
Dy liderëve të UÇK-së, presidentit, Hashim Thaçi dhe kryetarit të PDK-së, Kadri Veseli të mërkurën iu bë publike, propozim aktakuza për krime lufte nga Zyra e Prokurorit të Specializuar.