Kosova me shumicë-myslimane do të njohë shtetin hebre, ndërsa Serbia premton të zhvendosë ambasadën në Jeruzalem.
Izraeli shënoi dy fitime diplomatike të premten kur Kosova me shumicë myslimane ra dakord të njoh shtetin hebre dhe Serbia tha se do të zhvendoste ambasadën e saj në Jeruzalem nga Tel Aviv, shkruan “The Guardian”.
Gazeta prestigjioze britanike shkruan se vendimet erdhën pas një marrëveshjeje të ndërmjetësuar nga Shtëpia e Bardhë midis dy rivalëve ballkanikë për të normalizuar marrëdhëniet ekonomike, dy dekada pasi që ata zhvilluan një luftë të hidhur.
Benjamin Netanyahu, kryeministri izraelit, tha se Serbia do të bëhet vendi i parë evropian që transferon ambasadën e saj në Jeruzalem, pas njohjes nga Donald Trump të qytetit si kryeqytet të Izraelit gati tre vjet më parë.
Kosova gjithashtu do të vendosë misionin e saj në Jeruzalem dhe në shkëmbim do të fitojë njohjen e Izraelit, pasi kërkon të legjitimojë më tej deklaratën e saj të pavarësisë dhe shtetësisë të vitit 2008.
“Falënderoj mikun tim – presidentin e Serbisë për vendimin për të njohur Jeruzalemin si kryeqytet të Izraelit dhe për të transferuar ambasadën e tij atje”, tha Netanyahu, duke shtuar se lëvizja e diskutueshme do të vazhdojë deri në korrik 2021.
Ishte lajmi i dytë nga Uashingtoni në një muaj për Izraelin në frontin diplomatik. Në gusht, SHBA-të ndërmjetësuan një marrëveshje për Emiratet e Bashkuara Arabe për të normalizuar marrëdhëniet me Izraelin.
Marrëveshja, që pritet të nënshkruhet në një ceremoni në Shtëpinë e Bardhë në javët e ardhshme, do të jetë e para e Izraelit me një komb të Gjirit.
Palestinezët reaguan me cinizëm ndaj njoftimeve të Kosovës dhe Serbisë, duke sugjeruar se ata kishin për qëllim forcimin e perspektivave të rizgjedhjes së Trump pas dy muajsh.
“Palestina është bërë viktimë e ambicieve elektorale të Presidentit Trump, ekipi i të cilit do të ndërmarrë çdo veprim, pa marrë parasysh sa është shkatërrues për paqen… për të arritur rizgjedhjen e tij në nëntor”, shkroi në Twitter Saeb Erekat, sekretar i përgjithshëm i Organizatës për Çlirimin e Palestinës (PLO). “Kjo, ashtu si marrëveshja UAE-Izrael, nuk ka të bëjë me paqen në Lindjen e Mesme”, ka thënë ai.
Këshilltari i lartë dhe dhëndri i Trump, Jared Kushner, tha se lëvizjet do të përparojnë paqen dhe do t’i bëjnë amerikanët më të sigurt.
“Përparimi i sotëm është me të vërtetë historik”, tha Kushner në Shtëpinë e Bardhë. “Ky është vetëm një kapitull tjetër që ka qenë në gjendje të shkruajë kjo administratë për ta bërë botën një vend më të sigurt dhe më paqësor”, shtoi ai.
Tradicionalisht, shumica e misioneve diplomatike në Izrael kanë qenë në Tel Aviv, ndërsa vendet qëndruan neutrale mbi qytetin e diskutueshëm të Jeruzalemit, i shenjtë për tre besimet Abrahamike, derisa statusi i tij të zgjidhej në një marrëveshje paqësore Izraelito-Palestineze.
Izraeli mori kontrollin e Jeruzalemit Lindor në vitin 1967 dhe më vonë e aneksoi atë në lëvizjet që nuk u njohën kurrë nga bashkësia ndërkombëtare.
Kombet e Bashkuara dhe Bashkimi Evropian, partneri kryesor ekonomik i Izraelit, kanë thënë se statusi përfundimtar i qytetit duhet të negociohet midis izraelitëve dhe palestinezëve dhe thonë se deri atëherë, vendet nuk duhet të vendosin ambasadat e tyre atje.