Çmimet e lira dhe mirëpritja në Kosovë u ka bërë përshtypje tifozëve të Anglisë, që tashmë kanë arritur në Kosovë për ta përcjellë ekipin kombëtar të tyre. Ata janë shprehur të kënaqur me udhëtimin e tyre nëpër rrjete sociale.
Kosova do ta presë nesër në orën 16:00 në stadiumin “Fadil Vokrri” në Prishtinë Kombëtaren e Anglisë, për ndeshjen e fundit në kuadër të Grupit A kualifikues për Kampionatin Evropian 2020.
Para kësaj ndeshjeje, Kombëtarja e Anglisë do të arrijë në aeroportin “Adem Jashari” sot në orën 18:30, ndërsa trajneri anglez Gareth Southgate do të mbajë konferencë në Prishtinë në orën 19:30.
Mirëpo, shumë tifozë anglezë kanë ardhur më parë në Prishtinë. Ata kanë treguar nëpër llogaritë e tyre në rrjetet sociale se janë duke i shijuar çmimet e lira dhe mirëpritjen në Kosovë.
“I hëngra tri ushqime dhe rreth 30 birra dhe i shpenzova vetëm 30 euro, Kosova është vendi më i mirë në Tokë”, ka thënë Josh Pownall.
Vlera e kësaj ndeshjeje të së dielës ka rënë për Kosovën pas humbjes të së enjtes në Çeki, pasi që tani “Dardanët” e kanë të pamundur të kualifikohen në Kampionatin Evropian 2020 përmes Grupit A.
Në anën tjetër, Anglia e ka siguruar kualifikimin, mirëpo i duhet fitorja për t’u siguruar që është fituese e grupit. Nëse e kalon grupin si fituese, Anglia ka më shumë gjasa të përballet me Kombëtare më të dobëta në letër në fazën e grupeve të Evropianit.